Álemdi ábigerge salǵan indet aqhalatty abzal jandardyń qadiri qanshalyqty bıik ekenin taǵy bir dáleldeı tústi. Aýa jetpeı, aýyr halde emhana esiginen engen naýqastardyń aıaǵynan qaıta turýyna aıanbaı eńbek etken mańyzdy mamandyq ıeleriniń alar orny aıryqsha.
Memleket basshysy Qasym-Jomart Toqaev «Jańa jaǵdaıdaǵy Qazaqstan: is-qımyl kezeńi» Qazaqstan halqyna Joldaýynda medısına salasyna meılinshe kóńil bólinetinin atap ótken edi. «Pandemııa týyndatqan daǵdarys bizdi kóp nársege úıretti. Máselen, dárigerdiń eńbegin baǵalaı biletin boldyq. Bir kezde medısına qyzmetkerleriniń memleket nazarynan tys qalǵany ras edi. Dáriger mamandyǵyn materıaldyq turǵydan da nyǵaıta túsý mańyzdy bolyp otyr. Bıýdjetti taıaýdaǵy naqtylaý kezinde ekinshi jartyjyldyqta medısına qyzmetkerlerin yntalandyratyn qosymsha tólem úshin 150 mlrd teńge bólýdi tapsyramyn. Muny biz qazirgi daǵdarys kezinde qolǵa alyp jatyrmyz, endi ony júıeli túrde júzege asyrýymyz kerek. 2023 jylǵa qaraı dárigerlerdiń jalaqysy ekonomıkadaǵy ortasha jalaqydan eki ese artyq bolady», dedi Prezıdent.
О́tken jyly jalpy medısına mamandarynyń jalaqysy 20-30 paıyzǵa kóterildi. Al bıyl dárigerlerdiń ortasha jalaqysy shamamen 320 myń teńgege deıin kóteriledi. Bul ıgilik odan saıyn artyp, eńbekaqy 2023 jyly 561 myń teńge bolmaq. Sondaı-aq orta medısına qyzmetkerleriniń ortasha jalaqysy 2021 jyly 173 myń teńge bolsa, 2023 jyly 210 myń teńgege deıin jetedi.
Basy aýyryp, baltyry syzdaǵan dármensiz adam dárigerlerdiń dárgeıine júginetini anyq. Súringenge súıenish, qulaǵanǵa taıanysh bolyp júretin meıirimdi medısına qyzmetkerleriniń mereıli merekesi ult úshin de, urpaq úshin de asa mańyzdy. Izgilikti iste irkilmeıtin janashyr jandardyń eńbegi eren. Memlekettiń mereıi tasyp, mádenı mártebemiz hám ekonomıkalyq eńsemizdiń bıik bolýyna birden-bir áser etetin medısına ekeni aıdan anyq. Salmaqty salanyń tizginin ustap, tirshilikke nár berip turatyn aıaýly da aıbyndy dárigerlerdiń dárejesi qashanda bıik bolýǵa tıis.
