Memleket basshysynyń aıtýynsha, medısına qyzmetkerleriniń qoǵamdaǵy mártebesin arttyrý úshin «Qazaqstan Respýblıkasynyń eńbek sińirgen dárigeri» ataǵy engizilmek. Ataqpen birge materıaldyq syıaqy da beriledi. Onyń kólemin Úkimet belgileıdi.
Budan bólek, Prezıdent Qasym-Jomart Toqaev densaýlyq saqtaý júıesinde qyzmet etý óskeleń urpaq úshin mártebeli ári tartymdy bolýy tıis ekenin atap ótti. Sonymen qatar Prezıdent orta deńgeıdegi medısına qyzmetkerlerine qoldaý kórsetý máselesine toqtaldy. Onyń pikirinshe, olar densaýlyq saqtaý júıesiniń basty resýrsy jáne jumystyń negizgi bóligin atqarady.
«Bizge meıirgerlerdiń jańa býynyn qalyptastyrý qajet. Olar tek oryndaýshylar ǵana emes, kóp salaly emdeý tobynyń jaýapkershilik júktelgen teń quqyqtyq músheleri bolýy tıis. Osy oraıda olardyń kásibı daıyndyǵynyń deńgeıin birtindep kóterip, meıirgerlik isiniń mártebesin arttyrý qajet», dedi Memleket basshysy.
Prezıdent óz sózinde Elbasynyń bastamasymen iske asyrylǵan «Biz birgemiz» aksııasy aıasynda pandemııaǵa qarsy kúreske zor úles qosqan eriktiler men mesenattardyń qyzmetin atap ótti.
Qasym-Jomart Toqaev barsha medısına qyzmetkerlerin kásibı merekesimen quttyqtap, «Altyn júrek» eskertkishi ornalasqan saıabaqty «Dárigerler alleıasy» dep ataýdy usyndy. Memleket basshysy jańadan ashylǵan keshen aq halatty abzal jandarǵa degen halyq alǵysynyń belgisi bolatynyna senim bildirdi.
Jıyn sońynda Memleket basshysy medısına qyzmetkerlerimen áńgimelesti. Dárigerler kórsetilip jatqan qoldaýǵa alǵys aıtty.
