Sóıtip, atalǵan is-sharaǵa qatysqan 30 qaraǵandylyq jas vıdeorolıkter arqyly elge ekpe alýdyń mańyzyn túsindirdi, vaksınalaýdan ótken ózderiniń tájirıbesimen bólisti. Aıta ketý kerek, aksııaǵa qatysýshylar arasynda qalalyq shtabtyń eriktileri, jastar máslıhatynyń depýtattary jáne jas oqytýshylar boldy. Mysaly, E.Bóketov atyndaǵy QarMÝ-dyń belsendi stýdenti Bektas Juman qalypty ómirge qaıta oralýdyń birden-bir kepili vaksına alý ekendigin aıtady. «Jaman tumaýdy» alǵashqylardyń biri bolyp juqtyrǵan ol ekpe salý ortalyqtary ashylǵanda, oılanbastan tizimge birinshilerdiń qatarynda tirkelipti.
– Meniń týystarym da indettiń jeńil túrimen aýyryp shyqty. Qazir olar vaksına saldyryp alǵan. Ekpe bizdi el ishine dendep engen indetten qutqarady dep oılaımyn, – deıdi belsendi jas.
Al Qaraǵandy tehnıkalyq ýnıversıtetiniń magıstranty jáne «Jas Orda» jastar qaýymdastyǵynyń jetekshisi Ilııas Smaılov bolsa, Spýtnık V vaksınasynyń eki komponentin de alǵanyn, qazirgi jaǵdaıda ózin jaqsy sezinetinin aıtady. Onyń aıtýynsha, ekpe alýǵa dostarymen birge barǵan eken. «Vaksınalaý ujymdyq ımmýnıtetti qalyptastyrady», degen magıstrant ta jurtty jappaı ekpe alýǵa shaqyrdy.
«Sary» aımaqqa ótken Qaraǵandy oblysyndaǵy epıdemıologııalyq jaǵdaı áli de bolsa jaqsaryp ketken joq. Sońǵy táýliktegi málimetter osylaı deýge tolyq negiz beredi. Máselen, apta basynda óńirde «jaman tumaýmen» aýyrǵandar sany 150 naýqasqa jetse, jazylyp shyqqandarynyń sany bar-joǵy 50 adamdy quraǵan eken.
