Elimizde «Delta» shtamy, ıaǵnı «Úndi» shtamynyń anyqtalýyna baılanysty vedomstvoaralyq komıssııanyń sheshimimin elordada karantın sharalary kúsheıtildi. Bul týraly Ortalyq kommýnıkasııalar alańynda Premer-Mınıstrdiń orynbasary Eraly Toǵjanov jan-jaqty málimet berdi. Onyń aıtýynsha, Qazaqstandaǵy epıdemııalyq jaǵdaı turaqty. Sońǵy aıda koronavırýs ınfeksııasymen aýrý deńgeıi 1,7 esege tómendedi. Stasıonarlyq em qabyldap jatqan naýqastar sany 2,1 esege, al ambýlatorlyq emdelýdegi naýqastardyń sany 1,7 esege azaıdy. Infeksııalyq tósektik oryndardyń qory jetkilikti. Búginde onyń 25 paıyzy, al reanımasııalyq tósektik oryndardyń 21 paıyzy ǵana qoldanysta. Degenmen qazir álemde indet juqtyrýdyń artyp jatqany baıqalady. Onyń ishinde aýrýdyń jańa shtamdary da kóptep taralýda.
– Nur-Sultan qalasynda Sovid-19-ben aýrý deńgeıiniń ósýine baılanysty vırýstyń mýtasııaǵa ushyraý yqtımaldylyǵyna qatysty skrınıng júrgizilgen. Aldyn ala nátıjeleri vırýs mýtasııasynyń anyqtalǵanyn jáne bul «Delta» shtamyna tán ekenin kórsetti. Densaýlyq saqtaý mınıstrliginiń jýyrda jasaǵan málimdemesinde aıtylǵandaı, túpkilikti qorytyndy tolyq genomdyq zertteý aıaqtalǵannan keıin belgili bolady. Bul shtamm kórshi elderde de anyqtalǵan. DDU málimetterine sáıkes «Delta» shtamy búginde álemniń 74 elinde anyqtalyp otyr, – dedi E.Toǵjanov.
Koronavırýstyń bul shtamynyń aýrýhanadaǵy naýqastardyń sanyn arttyrý jáne ólimge soqtyrý yqtımaldylyǵy joǵary. Sondaı-aq «Úndi» shtamy basqa shtamdarǵa qaraǵanda 60% juqpaly eken, orta eseppen bir adamnan 5-6 adam indetti juqtyrady. Sondyqtan qaýiptiń aldyn alý úshin VAK sheshimimen karantın talaptary qatańdatyldy.
Birinshiden, vaksına saldyrmaǵan qyzmet kórsetý salasynyń qyzmetkerleri, úlken ujymdar úshin jumys isteýge shekteýler engiziledi. Ekinshiden, KVI-ǵa qarsy vaksınadan bas tartatyn jáne vaksınalaýǵa medısınalyq qarsy kórsetilimderi joq qyzmet kórsetý salasynyń, ónerkásiptik kásiporyndardyń jáne ózge de uıymdasqan ujymdardyń qyzmetkerleri úshin mindetti PTR-testileý talaby engiziledi. Úshinshiden, Ashyq jobasyna jańa kásipkerlik sýbektilerin qosý úshin, sondaı-aq joba sheńberinde jumys istep turǵan sýbektilerdiń jumysyn jalǵastyrý úshin saýda núkteleriniń barlyq personaly men jalǵa alýshylaryn vaksınalaý qajettiligi boıynsha talap engiziledi. Tórtinshiden, Ashyq jobasyna saýda oıyn-saýyq ortalyqtary, saýda úıleri jáne azyq-túlik emes bazarlar engiziledi.
– Ashyq jobasy tıimdi jumys istep jatyr, bul 9 myńnan asa bıznes sýbektisine pandemııa kezinde jumys isteýge múmkindik berdi.
4 mln-nan asa qoldanýshy tirkelgen, el boıynsha ár mınýt saıyn myń adamnyń mártebesi tekseriledi. Sondaı-aq joba keıbir azamattardyń óz mártebesin bilip, sanıtarlyq talaptardy buzýdy jalǵastyryp jatqanyn kórsetti. Sáýirden bastap Ashyq arqyly 9,6 myńnan asa karantın rejimin buzýshy anyqtaldy, olardyń jartysynan kóbi – PTR-testtiń oń nátıjesi bar adamdar. Azamattardyń bul sanaty el halqyna naqty qaýip tóndiretinin atap ótkim keledi. Osyǵan baılanysty Densaýlyq saqtaý mınıstrligi karantın rejimin buzýshylarǵa 30 AEK nemese 87 510 teńge somasynda ákimshilik aıyppul salýdy kózdeıtin qosymsha erejeler qabyldady. Búginde 19 adamǵa qatysty ákimshilik is qozǵaldy, onyń ishinde 5 adamǵa aıyppul salyndy. Bul jumys jalǵasady, barlyq talap buzýshylar ákimshilik jaýapkershilikke tartylady. Taǵy da eske salyp óteıin, eger sizde PTR-test nátıjesi oń bolsa nemese naýqaspen tyǵyz baılanysta bolsańyz, onda úıde karantınde bolýyńyz kerek, óıtkeni siz basqalarǵa qaýip tóndiresiz! dedi vıse-premer.
Atalǵan naqty sharalar – qyzmet kórsetý salasyna, adamdar kóp jınalatyn oryndarǵa qatysty shekteýler. Budan ári sheshim epıdemııalyq jaǵdaıǵa baılanysty qabyldanbaq. Al jalpy, respýblıka kóleminde lokdaýn engizý kún tártibinde joq eken.
Indetke toıtarys berýdiń birden-bir amaly saqtyq sharalaryn qatań ustanyp, vaksına saldyrý ekeni túsinikti. Alaıda elimizde qoljetimdi vaksınalar qamtylyp, qajetti jaǵdaı jasalǵanymen, ekpe saldyrý qarqyny artar emes.
– Qazir biz azamattardyń vaksına alýyna jaǵdaı jasaýymyz kerek. Qajetti vaksına kólemi Qazaqstanda bar. Alǵashynda muny erikti túrde dep jarııalaǵan edik. Biraq jańa syn-qaterlerdi eskere otyryp, qosymsha sharalar qabyldaýǵa májbúr boldyq. Qazirgi ýaqytta Qazaqstanda 2,4 mln doza vaksına qory bar. Oǵan qosymsha eki aptada taǵy 2 mln vaksına jetkizýdi qamtamasyz etemiz. Shyndyǵynda, vaksınalaý qarqyny kóńil kónshitpeı otyr. Bul birqatar oblys pen Nur-Sultan qalasyna qatysty. Sondyqtan vaksınalaý sanyn arttyrý talaptary kúsheıedi, táýligine 70 myń dozaǵa deıin jetkizý mindetin qoıyp otyrmyz. Osy mejege umtylamyz, – dedi E.Toǵjanov.
Brıfıng barysynda Densaýlyq saqtaý mınıstri «Úndi» shtamynyń belgileri Almaty qalasynda da baıqalǵanyn atap ótti.
– «Úndi» shtamynyń elde qalaı taralatynyn túsiný óte mańyzdy. Nur-Sultannan basqa Almatyda bul shtamnyń yqtımal belgileri paıda boldy. Tipti bir jaǵdaı anyqtaldy. Sınhrondaý negizinde biz el boıynsha keńirek kórinisti kóre alamyz. Jalpy, densaýlyq saqtaý júıesi reaksııa berý boıynsha qaıta quryldy. Rezervtik tósektik oryn qoryn kem degende eki ese kóp ornalastyrýǵa bolady. Dárilik zattardyń qoımalarda úsh aılyq qory bar, jeke qorǵanys quraldary da jetkilikti, – dedi A.Soı.
