Oblystyq Densaýlyq saqtaý basqarmasynyń málimetinshe, ýaqyttyń úlken aıyrmashylyǵyna qaramastan, taraptar onlaın-kezdesý ótkizip, koronavırýs ınfeksııasyn emdeýdiń qyr-syryn talqylaı aldy.
Medısına ǵylymdarynyń doktory Bendjamın Bodnar pavlodarlyq áriptesterine tromboz qaýpi joǵary pasıentterde antıkoagýlıanttyq terapııa jáne júrektiń ıshemııalyq aýrýy, qant dıabeti jáne semizdik sııaqty ilespe aýrýlary bar pasıentterge qarqyndy terapııa júrgizý týraly aıtyp berdi. Djons Hopkıns ýnıversıtetiniń pýlmonologııa jáne reanımasııa salasyndaǵy ǵylymı qyzmetkeri Rebekka Dezýb sozylmaly ókpe patologııasy bar naýqastarda ókpeni jasandy jeldetýdiń róli jáne ókpeni jasandy jolmen jeldetýdi júrgizý kezińdegi asqynýlar týraly baıandama jasady.
Sonymen qatar ol COVID-19 emdeýdegi bakterııaǵa qarsy terapııa tájirıbesimen bólisti.
«Vebınarda talqylaǵan keıbir máseleler áli kúnge deıin daýly bolyp keledi - bul etıotropty, patogenetıkalyq emdeý, sıtokındik daýyl, respıratorlyq jáne bakterııaǵa qarsy terapııa máseleleri. Meni antıkoagýlıanttyq terapııa taqyryby qyzyqtyrdy. Men amerıkalyq mamandar oǵan qandaı kórsetilimder beretinin jáne qandaı antıkoagýlıanttarǵa artyqshylyq beretinin bilgim keldi. Olar biz sııaqty dárilerdi - fraksııalanbaǵan jáne tómen molekýlaly geparınderdi qoldanatyny belgili boldy», deıdi Pavlodar oblysynyń shtattan tys bas anestezıolog-reanımatology Inna Glovaskaıa.
Vebınarǵa medısına qyzmetkerlerinen basqa Qazaqstannyń San-Fransıskodaǵy bas konsýly Azamat Ábdiraıymov, Pavlodar oblysy ákiminiń orynbasary Aızada Qurmanova jáne oblystyq Densaýlyq saqtaý basqarmasynyń basshysy Aıdar Seıitqazınov qatysty.
«Bizge AQSh-taǵy pasıentterdi suryptaý boıynsha trıaj-júıesine qandaı tásil qajet ekeni qyzyq boldy. Jalpy, mundaı tájirıbe almasý búginde koronavırýs ınfeksııasyn emdeýmen aınalysatyn medısına qyzmetkerlerimizge paıdaly boldy. Biz COVID-19 bar pasıentterge medısınalyq kómekti uıymdastyrý turǵysynan durys baǵytta kele jatqanymyzǵa kóz jetkizdik», dedi Aıdar Seıitqazınov.
Djons Hopkıns ýnıversıteti – AQSh-tyń Merılend shtatynyń Baltımor qalasynda Djons Hopkıns negizin qalaǵan jeke zertteý ýnıversıteti. Ýnıversıtettiń fılıaldary Qytaıdyń Nankın jáne Italııanyń Bolonıa qalasynda ornalasqan. 2013 jyly bul JOO álem ýnıversıtetteriniń akademııalyq reıtınginde 17-shi orynǵa ıe boldy. Munda ártúrli ýaqytta 36 Nobel syılyǵynyń laýreattary jumys istegen.
Hopkıns ýnıversıteti búgingi tańda naqty ýaqyt rejıminde koronavırýstyń búkil álemde taralýyn baqylaıdy.
