«Iohan Kroıff Arenada» (Amsterdam) ótken Danııa – Ýels arasyndaǵy alǵashqy shırek fınal kezdesýinde danııalyq fýtbolshylar qarsylastarynyń qaqpasyna jaýapsyz tórt gol soǵyp, qatarynan ekinshi kezdesýde iri eseppen jeńiske jetti. Match bastala sala oıyn tizginin óz qoldaryna alǵan danııalyqtar kezdesýdiń 27-mınýtynda esepti ashty. Mıkkel Damsgardtan tamasha pas alǵan Kasper Dolberg qaqpanyń alys buryshyn dál kózdep, quramasyn alǵa shyǵardy. Ýels fýtbolshylary gol oıynnan tys jaǵdaıda soǵyldy dep tóreshini kúmándandyryp qoıǵan soń germanııalyq bas qazy VAR kómegine júginip, beıne qaıtalaýdy kórgennen keıin gol oıyn jaǵdaıynda soǵylǵanyna kóz jetkizdi. Sóıtip Danııanyń basymdyǵymen ótken alǵashqy taım 0:1 esebimen aıaqtaldy.
Úzilisten keıin de qarsylastaryna qaraǵanda belsendi bolǵan Danııa 47-mınýtta esepti eseleı tústi. Bul joly da Kasper Dolberg mergendigimen kózge túsken bolatyn jáne tóreshi Dolbergtiń ekinshi golyna da kúmánmen qarap, taǵy da beıne qaıtalaýǵa júginýge májbúr boldy. VAR-tyń kómeginen keıin tóreshi gol oıyn jaǵdaıynda soǵyldy degen sheshim shyǵardy. Esep – 0:2. Qaqpasyna eki gol ótkizip alǵan soń Garet Beıl bastaǵan Ýels quramasy esep aıyrmasyn qysqartýǵa qansha tyrysqanymen, danııalyqtar oǵan múmkindik bermedi. Matchtyń aıaqtalýyna 2 mınýt qalǵanda Ioakım Mehle esepti 0:3-ke jetkizse, ekinshi taımǵa qosylǵan qosymsha mınýtta shabýylshy Martın Breıtýeıt Danııanyń tórtinshi golyn soǵyp, oıynnyń núktesin qoıdy. Matchtyń 90-mınýtynda Ýels oıynshysy Harrı Ýılson qyzyl qaǵaz alyp, alańnan qýyldy.
Osylaısha, 2016 jylǵy Eýropa chempıonatynda úshinshi oryn alǵan Ýels bıylǵy birinshilikti pleı-off kezeńinde aıaqtaýǵa májbúr boldy. Al shırek fınalǵa joldama alǵan Danııa endi ¼ fınalda Nıderland – Chehııa jubynyń jeńimpazymen kezdesedi.
Pleı-off kezeńiniń ekinshi kezdesýinde Italııa men Aýstrııa quramalary shırek fınaldyń joldamasyn sarapqa saldy. Teń dárejede ótken oıynda qarsylastar 90 mınýt boıy bir-biriniń qaqpasynan sańylaý taba almaǵandyqtan, jeńimpaz quramanyń esimi qosymsha taımda anyqtaldy. 95-mınýtta Italııa sapynan Federıko Keza kezdesýdiń esebin ashsa, arada 10 mınýt ótkende Matteo Pessına quramasynyń ekinshi golyn soǵyp, «Skýadra Adzýrrany» shırek fınalǵa alyp shyqty. Matchtyń 144-mınýtynda Sasha Kaladjıch esep aıyrmasyn qysqartýǵa múmkindik alǵanymen, bul gol Aýstrııanyń kelesi kezeńge shyǵýyna azdyq etti.
Aýstrııa quramasynyń oıyn taǵdyryn negizgi ýaqytta sheship tastap, shırek fınalǵa shyǵatyndaı tamasha múmkindigi bolǵan edi. Alaıda Eýropa chempıonatynda bıyldan bastap qoldanysqa engen VAR júıesi oǵan múmkindik bermedi. Ekinshi taımnyń 65-mınýtynda Marko Arnaýtovıch Italııa qorǵaýshylaryn qapy qaldyryp, mergendik tanytqan edi. Biraq tóreshi beıne qaıtalaýdan keıin gol oıynnan tys jaǵdaıda soǵyldy dep, Arnaýtovıchtiń golyn esepke almaı qoıdy.
2008 jáne 2016 jylǵy Eýropa chempıonatynda toptyq kezeńnen árige asa almaǵan Aýstrııa óz tarıhynda tuńǵysh ret kári qurlyqtyń pleı-off kezeńine shyǵyp, Eýropa birinshiligindegi úzdik nátıjesine qol jetkizdi. Al Italııa quramasy ádettegideı kezekti ret týrnırdiń shırek fınalyna joldama alyp otyr. Sonymen qatar «Skýadra Adzýrra» fýtbolshylary jeńilissiz serııasyn 31 oıynǵa jetkizip, 80 jyldyń rekordyn jańalady. Italııalyq fýtbolshylar 1930 jyly qatarynan 30 matchta qarsylastarynan basym túsken bolatyn.
Endi Italııa quramasy shırek fınalda Belgııa – Portýgalııa jubynyń jeńimpazymen kezdesedi.
