Senatorlar – Áleýmettik-mádenı damý jáne ǵylym komıtetiniń músheleri Kodeks tujyrymdamasyn talqylaý úshin Eńbek jáne halyqty áleýmettik qorǵaý mınıstrliginiń ókilderimen kezdesti.
«Qazirgi ýaqytta áleýmettik qamsyzdandyrý salasyndaǵy qatynastar 16 zańmen, 1 Kodekspen jáne birqatar basqa zańnamalyq aktilermen retteledi. Normatıvtik quqyqtyq aktiler stılindegi aıyrmashylyqtar, áleýmettik quqyqtar normalarynyń qaıtalanýy men bytyrańqylyǵy halyqtyń áleýmettik zańnamany túsinýin qıyndatady», dedi Senattyń Áleýmettik-mádenı damý jáne ǵylym komıtetiniń hatshysy Narıman Tóreǵalıev.
Eńbek jáne halyqty áleýmettik qorǵaý mınıstri Serik Shapkenov depýtattarǵa usynylyp otyrǵan zań jobasyndaǵy negizgi jańalyqtar týraly aıtyp berdi. Máselen, Áleýmettik kodeks tujyrymdamasynyń jobasyna sáıkes biryńǵaı áleýmettik standarttar men tásilderdi engizý kózdelip otyr. Kodeks jobasyna áleýmettik kómek kórsetýdiń ataýlylyǵy, táýekelderdiń aldyn alý jáne eskertý, áleýmettik saıasattyń ınklıýzıvtiligi qaǵıdattaryn engizý josparlanýda.
Budan basqa, ana men balany qoldaýǵa, az qamtylǵan otbasylarǵa kómekke, áleýmettik qyzmetter júıesin jetildirýge, erekshe qajettilikteri bar adamdardy qorǵaýǵa, áleýmettik qyzmetker mártebesin arttyrýǵa jáne basqa da baǵyttarǵa basa nazar aýdarylatyn bolady.
Sondaı-aq QR Parlamenti Senaty janyndaǵy Jas sarapshylar klýbynyń ókilderi Áleýmettik kodeksti jaqsartý jónindegi usynystaryn aıtty.
