Aıtýly jarysta Qazaqstannyń erkin kúres sheberleri de kúsh synasty. Jerlesterimizdiń arasynan eń úzdik nátıjege Asyl Aıtaqyn qol jetkizdi. 61 kılo salmaqta beldesken ol barlyq qarsylasyn sypyra utyp, aqtyq synǵa alqynbaı jetti. Alaıda qazaq balýany sheshýshi tusta ırandyq Rahman Amýzadtan aılasyn asyra almaı, kúmis medaldi qanaǵat tutty. 74 kılo salmaqta saıysqa túsken Darhan Esenǵalı men 92 kılo salmaqta kúresken Ádilet Daýlynbaev qola júldeni enshiledi. Olardyń ekeýi de jartylaı fınalda jergilikti sportshylarǵa ese jiberdi.
Jarystyń komandalyq esebinde Iran quramasy ozdy. Parsy eliniń órenderi bes márte jeńis tuǵyrynyń eń bıik satysyna kóterildi. Olar – Álı Zadegan (57 kılo), Rahman Amýzad (61 kılo), Muhammed Nakhodı (79 kılo), Ámirhosseın Fırazpýr (86 kılo) jáne Abbas Forýtanramı (125 kılo). Sondaı-aq qyrǵyzstandyq Álıbek Osmanov (65 kılo), grýzııalyq Zýrab Iаkobashvılı (70 kılo), túrkııalyq Iаkýb Gor (74 kılo) pen Selım Iаshar (92 kılo) jáne ázirbaıjandyq Shápip Sháripov (97 kılo) bas júldeni qanjyǵalaryna baılady.
