«Osy Parlamenttik sessııa kezinde barlyq fraksııa ókilderi ádettegideı memleketimizdiń ekonomıkalyq jáne qarjy-bıýdjet saıasatyn qoldaýǵa erekshe kóńil bóldi. Sebebi qarjy salasy elimizdiń damýyn, halqymyzdyń áleýmettik jaǵdaıyn qamtamasyz etýdiń basty kepili. Bul baǵytta biz 2021-2023 jyldarǵa arnalǵan respýblıkalyq bıýdjet týraly zańǵa tıisti túzetýler engizip, Elbasynyń jáne Memleket basshysynyń tapsyrmalaryn oryndaýdy qamtamasyz ettik. Sonyń nátıjesinde áleýmettik qoldaýǵa, densaýlyqqa, bilim, shaǵyn jáne orta bıznes, eńbekpen qamtý salalaryna, ınfraqurylym, basqa da mańyzdy baǵyttardy damytýǵa qosymsha úlken qarajat bólindi», dedi palata tóraǵasy.
Mysaly, áleýmettik salany nyǵaıtýǵa 374 mlrd teńge qaralsa, 140 mlrd teńge qarjy repýblıkalyq jáne jergilikti joldardy jóndeýge, qaıta qalpyna keltirýge baǵyttalǵan. Eńbekpen qamtýdyń jol kartasy aıasynda 100 mlrd-qa jýyq teńge, al «Aýyl – el besigi!» baǵdarlamasyn júzege asyrýǵa 70 mlrd teńge bólindi.
«Bir másele týraly erekshe aıtý kerek. Ol – elimizde qalyptasqan koronavırýs indetine qarsy kúreske baılanysty. Bul máseleniń elimiz úshin, halqymyz úshin mańyzdylyǵyn eskere otyryp, bıýdjetten 265 mlrd teńge qarajat qaraldy. Osynyń barlyǵy, árıne az aqsha emes. Sondyqtan Parlament barlyq qarajatty maqsatqa saı tıimdi paıdalanýǵa árqashanda qatań baqylaý jasap keledi. Sebebi, bıýdjettiń árbir tıyny sapaly, nátıjeli, tıimdi jumsalýy kerek. Ony árbir qazaqstandyq azamat bilýi jáne sezý qajet», dedi Nurlan Nyǵmatýlın.
