Tokıoda beldesetin balýandar

Qazaqstannyń grek-rım kúresi sheberleriniń Tokıoǵa tolyq qurammen barýyna barlyq múmkindigi boldy. Olaı deýge negiz, Olımpııa oıyndarynyń joldamalary sarapqa salynǵan eki birdeı dúbirli doda óz jerimizde ótken edi. Alǵashqysy – 2019 jyly Nur-Sultanda jalaýy jelbiregen álem chempıonaty. Ekinshisi – Almatyda shymyldyǵy túrilgen Azııa memleketteri arasyndaǵy lısenzııalyq týrnır. О́kinishke qaraı, jerlesterimiz óz múmkindikterin paıdalana almaı, nebary úsh joldamany qanaǵat tutty. Árıne, bul kóńil kónshiterlik kórsetkish emes.
Sodan ulttyq qurama bapkerleri «Olımpıadaǵa kimderdi aparsaq?» dep biraz bas qatyrdy. Máselen, 60 kılo salmaq dárejesinde eki birdeı myqty sportshy bar. Olar – Meırambek Aınaǵulov pen Aıdos Sultanǵalı. 27 jastaǵy Meırambek. Ol álem chempıonatynda eki ret jeńis tuǵyryna kóterildi. 2017 jyly Parıdje kúmis alsa, 2019 jyly Nur-Sultanda qola medaldi moınyna ildi. Odan bólek, Azııa oıyndary men qurlyq birinshiliginde júldegerler qataryna qosyldy. 25 jastaǵy Aıdos 2018 jyly Býdapeshttegi dúnıejúzilik dodada úzdik úshtikti qorytyndylady. Desek te bul joly tańdaý Aınaǵulovqa tústi. Sebebi Meırambek sońǵy kezderi halyqaralyq dodalarda jap-jaqsy kúresip júr.
77 kılo salmaq dárejesindegi jaǵdaı da dál solaı. Osydan eki jyl buryn ótken álem chempıonatynda Ashat Dilmuhamedov jeńis tuǵyryna kóterile almaǵanymen, shırek fınalǵa deıin jetip, joldamaǵa qol jetkizdi. Onyń Nur-Sultandaǵy óneri jaqsy áser qaldyrdy. Ashattyń aıtýly jarys barysynda Olımpııa oıyndary men álem chempıonatyn eki retten utqan reseılik Roman Vlasovty qapy qaldyrýy joǵarydaǵy sózimizdiń aıqyn dáleli. Desek te bul salmaqta Demeý Jadyraev ta bar. Ol – 2017 jyly Parıjde ótken álem chempıonatynyń kúmis júldegeri. Ashat 34 jasta, Demeý 31-de. Sodan mamandar ekeýin túrli jarystarǵa aparyp, qaısy jaqsy nátıje kórsetse, sony Tokıoǵa aparamyz degen sheshimge keldi. Bul rette Jadyraevtyń joly boldy. Ol shet memleketterde ótken týrnırlerde basty qarsylasyna qaraǵanda táýir kúresti. Sol sebepti de bas bapkerdiń tańdaýy Demeýge tústi.
Al 87 kılo salmaqta Nur­sultan Tursynovtyń Olımpııa oıyn­daryna qatysýyna eshkim qarsylyq bildirmedi. О́ıtkeni bul salmaqta básekelestik deńgeıi tómen. Birer jyl Azamat Qustybaev táýir nátıje kórsetip, qurlyqtyq deńgeıdegi dodalarda júlde alǵan edi. Alaıda tórt jyldan keıin boz kilemge qaıta oralǵan ony Tursynov byltyr el birinshiliginiń fınalynda utyp, elishilik jarystarda ózine teń keler eshkim joq ekenin dáleldedi. Odan keıingi básekelerde de 30 jastaǵy Nursultan biraz belesterdi baǵyndyrdy.
Mine, Tokıo tórinde osy úsh balýanymyz óner kórsetedi. Grek-rım kúresinen Qazaqstan quramasy sońǵy ret 1996 jyly Atlanta Olımpıadasynda altyn alǵan edi. Sodan bergi kezeńde Georgıı Sýr­sýmııa (2004 jyly, kúmis), Mkhı­tar Manýkıan (2004 jyly, qola), Nur­baqyt Teńizbaev (2008 jyly, kúmis) jáne Danııal Gadjıev (2012 jyly, qola) júldegerler qataryna qosyldy. Biraq olardyń eshqaısysy da Iýrıı Melnıchenkonyń erligin qaı­talaı alǵan joq. Bálkim, osy joly úsh qandasymyzdyń bireýi Qazaq eliniń Ánuranyn shyrqatar?!