Jaǵymsyz habardyń taǵy biri shymkenttikterden jańa shtamnyń anyqtalǵany bolyp otyr. Shymkent qalasy ákiminiń birinshi orynbasary Shyńǵys Muqan beısenbiniń sáskesinde áleýmettik jelide jaısyz habardy jarııa etti.
«Jańa shtamnyń túri jaman, tez taraıdy, juqqan adamnyń aýrýy tez asqynyp ketedi. Ata-anańyz ben balalaryńyzdy saqtap júrińiz. Balalar arasynan da kóp shyǵyp jatyr. Búgin týǵanyna bir aı tolmaǵan sábıden tabyldy», dedi áleýmettik jelidegi jazbasynda ákimniń orynbasary.
Al tús aýa Shymkent qalasynyń bas memlekettik sanıtar dárigeri Ábdimanap Tólebaev megapolıste indet juqtyrǵandar arasynan «Delta» shtamy anyqtalǵanyn málimdedi.
«Qazir tekserý júrgizilýde. Biz naýqastardyń synamalaryn jiberdik. Densaýlyq saqtaý mınıstrligi Sanıtarııalyq-epıdemıologııalyq baqylaý komıtetiniń Ulttyq saraptama ortalyǵynda zertteý jumystary júrgizilýde. Degenmen «Delta» shtamy Shymkentke de jetti deýge negiz bar», dedi Á.Tólebaev.
Sondaı-aq ol sońǵy táýlikte anyqtalǵan 143 indet juqtyrǵandardyń 14-i 14 jasqa deıingi balalar ekenin, olar negizinen ata-analarynan juqtyrǵanyn naqtylady.
«Qaladan MPK laboratorııasynda qaıta tekserilgen 20 synamanyń, ıaǵnı vırýstyń mýtasııasynyń túrin zertteýge naýqastardan alynǵan 20 úlginiń 7-ýinen «Delta» shtamy anyqtalyp otyr. Shymkent qalasynda sońǵy eki apta ishinde koronavırýs aýrýshańdyǵynyń 908 jaǵdaıy tirkeldi, onyń ishinde sımptomdy – 637 (70,2%), sımptomsyzy – 271 (29,8%). 18 jasqa deıingiler arasynda 148 jaǵdaı tirkelgen. О́tken jyldyń osy kezeńimen salystyrǵanda bıyl eresekterdiń arasynda aýrýshańdyqtyń sımptomsyz túri 3,2 ese men balalar arasynda 4,4 ese joǵary tirkelýde», deıdi Á.Tólebaev.
Qalanyń «qyzylǵa» ótýi jáne jańa shtamnyń tabylýy kópshilikke de oı salyp otyr. Bul oraıda bir táýlik ishinde qalada 7 558 adam vaksına aldy. Onyń ishinde birinshi komponentpen 4 304, ekinshi komponentpen 3 254 adam vaksına saldyrdy. Egý naýqany bastalǵaly barlyǵy 263 358 adam ekpe saldyrǵan. Onyń ishinde 159 895 adam vaksınanyń eki komponentin aldy. Sondaı-aq Shymkent qalasynyń ákimi Murat Áıtenov sala mamandary men aýdan ákimderine turǵyndardyń vaksınaǵa degen oń kózqarasyn qalyptastyrý úshin túsindirý jumystaryn kúsheıtýdi mindettedi.
«Vaksınalaýǵa 753 medısına qyzmetkeri oqytylyp, jumyldyryldy. Búginde vaksına alatyn kontıngenttiń 47%-yna vaksına salyndy. Ekpe egý qarqynyn báseńdetpeı, túsindirý jumystaryn kúsheıtý kerek. Sozylmaly aýrýy bar azamattar men mádenıet, óndiris, qyzmet kórsetý, bilim jáne stýdentter men qurylysshylardy vaksınalaý kerek», dedi qala ákimi.
Sondaı-aq Murat Áıtenov aýdan ákimderine pandemııa kezinde kásipkerlerge jumys isteýge múmkindik beretin Ashyq jobasyna kóshýdi uıymdastyryp, epıdemııalyq jaǵdaıdyń qanshalyqty kúrdeli ekenin bile tura toı jasaıtyndardy toqtatý kerek ekenin aıtty.
Toıdy múlde toqtatý qıyndaý bolyp turǵany ras. Qala aýmaǵynda sanıtarlyq-epıdemııalyq talaptardyń saqtalýy boıynsha monıtorıng júrgizetin 20 mobıldik top 30 maýsymda 201 nysanǵa tekserý jumystaryn júrgizgen. Onyń ishinde 7 nysanda karantın rejiminiń talaptary buzylǵany anyqtalyp, ákimshilik hattamalar toltyryldy. Al 27 maýsymda Shymkent qalasynda ornalasqan «Aqbastaý» meıramhanasy karantındik shekteýlerdi buzyp, kelýshilerdi qabyldap jatqany anyqtalǵan. Sondaı-aq dámhanalardyń birinde 100 adamǵa arnalǵan qyz uzatý toıyn ótkizip jatqany belgili boldy. Atalǵan jaıt boıynsha karantın talaptaryn saqtamaı, jumysyn jalǵastyrǵan dámhana ákimshisinen túsinikteme alynǵan. Ál-Farabı aýdany ákimi apparatynyń qyzmetkerleri qalalyq polısııa departamenti mamandarymen birge meıramhanalarǵa júrgizgen kezekti reıd barysynda turǵyndardyń aýdan aýmaǵyna qarasty «Mereı», «Shymkent-Holl», «Teriskeı», «Narlen» meıramhanalarynda qudalyq, betashar, uzatý syndy toı ótkizilgenin anyqtap, olarǵa tosqaýyl qoıdy. Demalys kúnderi 84 kásipkerlik nysanǵa reıd júrgizilip, karantın talaptary saqtalmaǵan 9-yna aıyppul salynǵan.
Shymkent
