Mynaý ǵasyr – nurly ǵasyr, sen ony máńgige áldıle!
Aınalaıyn, dombyra seniń bar bolmysyń qazaqtyń saf bolmysy emes pe?! Qazaqtyń aımańdaı aqyny Qadyr Myrza Áli: «Naǵyz qazaq, qazaq emes, naǵyz qazaq – dombyra», – dep seniń taǵdyryńnyń tini tekti halyqpen sabaqtasqanyn jyrmen aıshyqtady. Al búgingiler she?! Bul jaǵyna kelgende qarys mańdaıǵa basylǵan taǵdyrǵa aıtam myń táýbe! О́ıtkeni bar ǵoı, dombyra, ulttyq aspap sen bolsań, ulttyń uly men bolsam, sen úshin sonsha shattandym, álemge qazaqpyn dep maqtandym!
Myna dáýir – muńly dáýir, sen ony máńgige terbet!
Antqa baılap, aptyǵymdy basyp, ózińmen oısha syrlasyp, keshegi kúndi qozǵasam, kóńilim tolqıdy da turady. Oshaǵy ottan túspegen ultymnyń taǵdyryna arqaý, tektiligine tireý bolyp, babalarymnyń kendi keýdesinen kúı bolyp quıylǵan da sen ediń ǵoı, dombyra! «Qarǵa da boıly Qaztýǵan, Qarǵadaı boıy bolsa da, alǵys alǵan halqynan» demekshi, Qaztýǵandaı jyraýlardyń da asqaq ánin qudiretiń arqyly júrekke qondyrǵanbyz. Seniń arqańda!
Shyny kerek, jurtynyń qamyn oılamas, jurtpen birge toılamas, aıyly bútin attydan jaıaý da júrip kek alǵan Jaıaý Musa babanyń, Seksen kóldi terbegen, Oqjetpesti teńseltip, Kóksheniń kerim aspanyn bult astynda qaldyrmaı, serilikpen kún keshken Aqandaıyn ardanyń, ıyǵyna ilmeı qul shekpen sezimniń qylyn myń shertken, Láılim-shyraq dep ándetken Birjan saldyń ánderi sen arqyly halqymnyń qambasynda qaldy qazyna bolyp. Mynaý qus qanaty talatyn saıyn dala sózge bulaq, oıǵa súleı tektilerimniń sazyna toldy. Seniń arqańda!
Mynaý álem – júreksiz álem, sen onyń janyn jibit!
