Kóz aldymyzda – sýretshi hám keskindemeshi Qanafııa Teljanovtyń «Kókpar» atty týyndysy. Alystan barlaǵan adam jalpy kókparǵa jaraqtanǵan jigitterdiń jantalasyn, tebisinen teńsele jazdap topqa kirgen qazanattyń qarqynyn kórgendeı, quddy jer úshin aıqasyp jatqan sarbazdar eken der. Osyndaı rýh pen kúshti qajet etetin at sportyn babalardyń qalaı oılap tapqanyna tańdanasyń.
Qylqalam sheberi óz shyǵarmashylyǵynda tarıhı taqyryptarǵa, peızaj janryna úńiledi. Sondaı-aq qazaq halqynyń mádenıeti men kóne dástúrlerin dáripteýdi oıǵa alǵan.
Jalpy, kókpar – qazaqtyń kónekóz oıyny. Úı irgesinen dúbirletip attar ótse qany týlap, kermedegi tulparyna turman salatyn jurtpyz. Bul ulttyq at sportyna jatqanymen, oıynnyń astary tereńde. Jaýgershilik zamanda batyrlyq pen eptilikke beıimdeý, sarbaz joldasy ysqyryp jetken oqtan opat bolǵan jaǵdaıda, at ústine óńgerip alyp, jat jerge, jaý tabanynda qaldyrmaýǵa mashyqtanýdyń eń yńǵaıly ádisi desek te bolady. О́ıtkeni shaıqasta sheıit ketken aqsúıek nemese qolbasynyń súıegin jaý qolyna berý – jalaýynyń jyǵylǵanymen teń. Sondyqtan da kókpar tartyp, maıdan dalasynda oryn alǵan tosyn oqıǵada tosylyp qalmaý úshin mashyqtanǵan sekildi. Bul biz biletin bir ǵana sıpaty men syry.
Sýretshi óziniń «Kókpar» kartınasynda barynsha shaýyp kele jatqan attaǵy shıryqqan shabandozdardyń bir-birimen jarysyp, kókpardy tartyp alýǵa tyrysqan oıynnyń eń shıelenisken sátin beınelegen. Kókpardy ustaǵan jigittiń astyndaǵy aty basyn joǵary kóterip, artqy aıaǵymen tur. Al oıynshy bolsa, erden qulap qalmas úshin attyń moınyna jabysyp, júgendi myqtap ustap alǵan. Aldyńǵy plandaǵy oıynshy úzeńgige turyp alyp kókparǵa qolyn sozýda. Avtor oıynshylardyń jel jelbiretken shashtary men jeıdelerin jáne shópti boıaýdy erkin, jalpaq etip jaǵý arqyly kórsetken.
Sýretshi jazyqtyń tómengi syzyǵyn paıdalanǵan. Keneptiń úshten ekisine aspan beınelengen. Mine, sodan baryp erkindik seziledi. Bul tásil nazardy oıynshylarǵa aýdartady. Aspannyń ashyq tústi bıik fonyndaǵy qara tústi attardyń aıyrmashylyǵy kózge uryp tur. Attardyń qıǵash ornalasýy da qozǵalys jasaıdy. Tulparlar bir sátte aspanǵa qalyqtap, júıitkip bara jatqandaı áser beredi.
Sýretshi oıynnyń erekshe serpinin, jeńiske degen qushtarlyqty, qyzbalyqty kórsetken. Ol kompozısııany kórermen ózin osy oıynǵa qatysyp turǵandaı sezinetindeı etip jazǵan.
