Sessııa qatysýshylarynyń aıtýynsha, qazirgi tańda Qazaqstan elektrondy kommersııanyń qarqyndy ósim aldynda tur. 2020 jyly ShOB ókilderiniń kópshiligi alǵash ret onlaınǵa shyqty. Al tájirıbeli ınternet satýshylar naryqtaǵy óz oryndaryn keńeıte bastady. Nátıjesinde ótken jyly onlaın saýda men qarjy aınalymy aıtarlyqtaı artty. PwC Kazakhstan zertteýinshe, 2020 jyldyń alǵashqy 9 aıynda Qazaqstandaǵy kóterme elektrondy saýda kólemi aldyńǵy jyldyń sáıkes ýaqytymen salystyrǵanda 93% kóbeıip, 198 mlrd teńgeden 382 mlrd teńgege jetken. Al ortasha túbirtek 63% ósip, tranzaksııa kólemi 18% ulǵaıǵan.
Sessııaǵa QR Saýda jáne ıntegrasııa vıse-mınıstr Ásel Janasova, PwC Eýrazııa óńirindegi konsýltasııalyq qyzmet boıynsha seriktesi Natalıa Lım, Mastercard Ortalyq Azııadaǵy bas dırektory Rafal Trepka, Wildberries halyqaralyq yntymaqtastyq boıynsha dırektory Dýhanın Alekseı, Lamoda Qazaqstan Bas dırektory Móldir Rysalıeva, Froot.kz Bas dırektory Rýla Raım jáne Forte Market Bas menedjeri Dmıtrıı Komıssar qatysty. Olar elektrondy kommersııany qoldaý men damytý aıasyndaǵy memleket basymdylyqtaryn talqylap, onlaın tólemdegi sońǵy úrdister týraly aıtyp, jergilikti jáne halyqaralyq naryqtaǵy erekshelikter men ondaǵy keı qıyndyqtar jáne Qazaqstandaǵy elektrondy saýdanyń bolashaǵy týraly óz oılaryn ortaǵa saldy.
QR Saýda jáne ıntegrasııa vıse-mınıstr Ásel Janasova Mastercard pen AHQO Fintech Hub birlese otyryp jasalǵan SmartDuken (ShOB-qa arnalǵan elektrondy saýda mektebi) platformasynyń iske qosylatynyn habarlady. SmartDuken – kásipkerlerdiń óz isterin keńeıtip, damytýǵa jáne jańadan qurýyna múmkindik beretin alań. Platforma ShOB-qa tegin kómek beredi. Atap aıtqanda tegin bilim berý kýrstaryn, vebınarlardy qamtıdy jáne seriktesterdi (IT-quraldar, CRM, tólem júıeleri, saıt qurastyrýshylar men ózgeler) tegin usynady. Sonymen qatar shaǵyn jáne orta bızneske arnalǵan bıznes akseleratordy qamtıdy. Akselerator bıznesti onlaınǵa shyǵarýǵa jáne keńeıtýge múmkindik beredi. Alańnyń maqsaty – bıznesti onlaınǵa aýystyrýǵa kómektesý.
