«Qaırattyń» mereıli sátteri

Arada 10 jyl ótken soń almatylyqtar Halyqaralyq temirjolshylar odaǵy kýbogynda top jarsa, 1976 jyly birinshi lıga komandalary arasyndaǵy saıysta qarsylas shaq keltirmedi. Al 1987 jyly «Qaırat» KSRO chempıonatynda jetinshi oryndy ıelendi. Bul – Qazaqstanda jasaqtalǵan komandanyń atalǵan dodadaǵy eń jaqsy kórsetkishi. Endi osy oqıǵalardyń árqaısyna jeke-jeke toqtala keteıik.

1965 jyly «Qaırat» A klasyndaǵy ekinshi topta óner kórsetip, ekinshi oryn­ǵa taban tiredi. Biz kósh basyndaǵy Erevannyń «Araratymen» birdeı upaı jıǵanymyzben, qosymsha kórsetkishter boıynsha armenııalyqtar aldymyzdy orap ketti. Soǵan qaramastan jerlesterimiz kelesi maýsymda myqtylarmen kúsh synasý múmkindigine ıe boldy. 1966 jyly Joǵary lıgadaǵy 19 komanda arasynan almatylyqtar 12 oryndy ıelendi. 36 kezdesý ótkizgen bizdiń oıynshylar 35 upaıdy qorjynǵa saldy. Tarqatyp aıtsaq, 12 ret utyp, 13 ret jeńilis tapty. Taǵy 11 match­ta teń esep tirkeldi. Dop aıyr­mashylyǵy – 30:39. Osy jarysta qalyń toptyń arasynda qalyp qoısaq ta, «Qaırattyń» oıy­ny jaqsy áser qaldyrdy. Olar eshbir básekede qarsylastarynan iri eseppen jeńilgen joq. Tipten keıbir kezdesýlerde qıynnan qıy­styryp, mańyzdy goldar soqty. Maýsym aıaqtalǵan soń osy jaıttardyń bar­lyǵy eskerilip, qazaq­standyq klýb «Je­ńiske degen jigeri» úshin syı­lyǵymen mara­pattaldy.

1976 jyly «Qaırat» Halyqaralyq temirjolshylar odaǵy kýbogy jolyndaǵy jarysqa qatysý qurmetine ıe boldy. Dál sol maýsymda qorǵaýshy Seıilda Baıshaqov pen qaqpashy Quralbek Ordabaev syndy qos qandasymyz respýblıkamyzdyń bas ko­mandasynyń jeıdesin kıgen edi. Seıilda Jambyldyń «Energetıginen», al Quralbek Shymkenttiń «Metallýrginen» aýysyp keldi.

Aıtýly dop dodasyndaǵy ózderiniń tusaýkeser kezdesýin jerlesterimiz Ko­shı­­­seniń «Lokomotıvimen» ótkizdi. Eki match­ty da óz paıdasyna sheshken «Qaırat» kelesi kezeńge esh qınalmaı ótti. Esep – 4:1 (úıde), 1:0 (syrt alańda). Kelesi báseke shıeleniske toly boldy. Almatyda Sofııa­nyń «Slavııasyna» 1:3 esebimen ese jiberip, jaǵdaıyn qatty qıyndatyp aldy. Desek te Vıktor Korolkov jetkeshilik etken komanda qarymta kezdesýde baryn saldy. Keremet oıyn órnegin kórsetken «Qaırat» óz jankúıerleriniń kóz aldynda Bolgarııanyń betkeustar komandasyn jer sıpatyp ketti. Esep – 3:0. Bul goldardyń avtorlary – Evgenıı Pıýnovskıı, Iýrıı Sevıdov jáne Vladıslav Markın.

Fınalda Býharestiń «Rapıdimen» kúsh synasty. Syrt alańda Rýmynııanyń eń beldi klýbynyń birimen ótken alǵashqy oıynda teń esep tirkeldi – 1:1. Úziliske sanaýly mınýttar qalǵanda Lýpeský 11 metr­lik núkteden qaqpany dál kózdese, ekinshi taımnyń bel ortasynda Sergeı Rojkov mergendik tanytty. Sheshýshi matchta «Qaı­rat» mynadaı quramda óner kórsetti: Quralbek Ordabaev, Vale­rıı Krýglyhın, Aleksandr Jýıkov, Seıilda Baıshaqov, Vladımır Asylbaev, Ev­genıı Mıhaılın, Oleg Dolmatov, Va­lentın Soldatov (56 mınýtta ony Vla­dıslav Markın almastyrdy), Evgenıı Pıýnovskıı, Sergeı Rojkov jáne Iýrıı Sevıdov (65 mınýtta ony Vıktor Abgols almastyrdy). Rýmynııalyqtardyń sapynda óz eliniń ulttyq quramasynyń alty birdeı fýtbolshysy oınady. Bul básekeniń taǵdyryn bir ǵana gol sheshti. 45-mınýtta Sevıdov úsh birdeı qorǵaýshyny aldap ótip, Rojkovqa ádemi pas berdi. Surmergen múlt ketken joq – 1:0. Sóıtip «Qaırat» Keńes Odaǵy klýbtary arasynan alǵashqy bolyp Temirjolshylar kýbogyn jeńip aldy. Osy jeńistiń arqasynda almatylyq fýt­bolshylardyń barlyǵy da sport shebe­riniń kúmis belgilerin keýdelerine taqty.

Iá, kúlli qazaqstandyq jankúıerdiń kózaıymyna aınalǵan «Qaırattyń» KSRO chempıonattarynda ala-qula óner kórsetkenin jasyra almaımyz. Bizdiń jigit­ter birde myqtylarmen kúsh synassa, endi birde osaldarmen oınaýǵa máj­búr boldy. 1974 jylǵy birinshiliktiń qory­tyndysy boıynsha kósh sońynda qalyp qoıǵan jerlesterimiz eki maýsym boıy birinshi topta baq synady. 1975 jyly «Krylıa Sovetov» (Kýıbyshev), «Dınamo» (Mınsk) jáne «Torpedodan» (Kýtaısı) qalyp qoıyp, tórtinshi orynǵa turaqtasa, 1975 jyly jarys kestesinde jeke-dara kósh bastap, qaıta elıtalyq topqa qosyldy.

1986 jyly Joǵary topqa oralǵan bette almatylyqtar adýyndy oıynymen kózge tústi. Ásirese Kıevtiń «Dınamosy» (2:1) men Máskeýdiń «Spartagyna» (1:0) qarsy kezdesýlerden keremet áser aldyq. Biz­diń jigitter Keńes Odaǵy fýtbolynyń aıtýly qos alpaýytyn tize búktirgende, Al­matydaǵy Ortalyq stadıonǵa jı­nalǵan 30 myńǵa jýyq kórermenniń erekshe shattanǵany da esimizde. Sol maýsymda 30 kezdesý ótkizgen almatylyqtar 11-in­de je­ńiske jetip, 11 ret jeńilistiń ker­mek dámin tatty. Taǵy 8 básekeni teń aıaq­­tady. Dop aıyrmashylyǵy – 33:39. Osy­­­laısha, jarys kestesinde jetinshi orynǵa jaıǵasty. Bul – «Qaırattyń» KSRO chem­pıonattaryndaǵy eń joǵary kór­setkishi.

Sol maýsymda «Qaırattyń» jartylaı qorǵaýshysy Vahıt Masýdov KSRO birinshiliginde soǵylǵan eń ádemi goldyń avtory atandy. Bul goldy ol Almatyda Dnepropetrovskiniń «Dnepr» klýbyna qarsy oıynda soqqan edi. Al únemi shabýyl ótinde júrgen Evstafıı Pehlevanıdı qarsylastar qaqpasyn 10 márte dál kózdep, surmergender saıysynda úzdik ondyqtyń qataryna endi.