Elbasy Nursultan Ábishuly Nazarbaev «Prezıdenttiń bes áleýmettik bastamasy» atty halyqqa úndeýinde stýdent jastardyń máselesine erekshe nazar aýdaryp, úshinshi bastamasynda 2022 jyldyń sońyna deıin stýdenttik jataqhanalardyń jaǵdaıyn jaqsartý men oǵan muqtaj jastardyń qajettilikterin óteýdi tapsyrǵan bolatyn. Osyǵan oraı búgin elordada 680 oryndyq jataqhananyń ashylý saltanaty ótti.
«Búgingi kúni 63 myńnan astam stýdent jataqhanaǵa muqtaj. Mektep túlekteriniń basym bóligi Almaty, Nur-Sultan jáne Shymkent qalalarynyń joǵary oqý oryndaryna túsetindikten, osy qalalarda stýdentter úıine degen suranys úlken. Búgingi kúngi qajettiliktiń teń jartysy Almaty qalasyna tıesili. Al Shymkent qalasy kelesi jyly stýdentterdiń barlyǵyn jataqhanamen qamtamasyz etedi degen úmit bar. Mundaǵy stýdenttik jataqhanaǵa qajettilik 15 myń oryndy quraıdy», deıdi Bilim jáne ǵylym mınıstrliginiń «Qarjy ortalyǵy» AQ prezıdenti Asqar Ibragımov.
Ýnıversıtet rektory Muhtar Baıjumanovtyń aıtýynsha, jataqhana qurylysy oqý ornynyń quryltaıshysy, akademık Quralbek Quljanovtyń bastamasymen salyndy. Qurylys 2019 jyldyń mamyr aıynda bastalǵan.
«Osy oraıda bizge qoldaý kórsetken Bilim jáne ǵylym mınıstrligine alǵys bildiremiz. Stýdentterdiń alańsyz bilim alýyna jaǵdaı jasaý ýnıversıettiń qurylǵan kúnnen bergi maqsaty bolatyn. Búgingi kúni ýnıversıtet stýdentter úıi qurylysymen qatar jabyq stadıon qurylysyn da aıaqtaýǵa jaqyn. Magıstranttar men aspıranttarǵa arnalǵan bólek oqý ǵımaratyn salý da josparlanyp otyr», dedi ol.
Bes qabattan turatyn ǵımaratta stýdenttik ashana, demalys bólmeleri, ár qabatta óz as úıi men jýyný bólmeleri, oqý zaldary bar. Bir bólemede tórt stýdent turatyn bolady. Barlyq bólmeler jańa tehnıka men qajetti jıhazdarmen jabdyqtalǵan. Stýdent úshin eń yńǵaılysy - jataqhananyń oqý korpýsynyń janynda ornalasýy. Jataqhananyń oń jaq korpýsynda qyzdar, sol jaq korpýsynda uldar ornalasatyn bolady. Jańa stýdentter úıinde medısınalyq pýnkt te qarastyrylǵan eken.
