UQK málimet boıynsha, Qazaqstan Respýblıkasy úshin negizgi esirtki qaýpiniń biri - aýǵan faktory. Aýǵanstandaǵy turaqsyz ahýal Ortalyq Azııa elderi arqyly Reseı men Eýropaǵa esirtki aǵynynyń jandanýyna yqpal etedi.
Qazaqstan Respýblıkasynyń Ulttyq qaýipsizdik komıteti 2021 jyldyń maýsymynda shetel seriktesterimen ózara is-qımylda Qyrǵyzstan men О́zbekstannan Qazaqstanǵa apıyn esirtkisiniń kontrabandasyn anyqtaý boıynsha 2 halyqaralyq operasııa júrgizdi.
«Arnaıy operasııa nátıjesinde 12,3 keli esirtki quralyn Qazaqstanǵa ákelýge jol berilmedi. О́zbekstan men Qazaqstan aýmaǵynda transulttyq qurylymdardyń 4 qatysýshysy qylmys ústinde ustaldy», delingen habarlamada.
Qyrǵyz Respýblıkasynan jetkizilgen esirtkini jasyryn orynnan alý kezinde Taraz qalasynyń esirtki kýreri – buryn osyǵan uqsas esirtki qylmysyn jasaǵany úshin sottalǵan Qazaqstan Respýblıkasynyń azamaty ustaldy.
«Aıyptalýshylar kinásin moıyndap, tergeýmen yntymaqtasýǵa kelisim berdi. Esirtki qylmysy úshin joǵarǵy merzim 20 jyl ne múlkin tárkileýmen ómir boıyna bas bostandyǵynan aıyrý. Esirtki trafıgine qatysy bar ózge de adamdardy anyqtaý boıynsha tergeý sharalary jalǵasyp jatyr», delingen UQK habarlamasynda.
