Endi №1 kópbeıindi qalalyq aýrýhana 9 shildeden bastap koronavırýstyq ınfeksııasy bar pasıentterdi qabyldaıdy. Onda 600 tósek-oryn ornalastyrylǵan. Qoǵamdyq densaýlyq saqtaý basqarmasy bul shara tósek-oryndardyń jetkiliksiz bolýy sebepti qabyldanǵanymen túsindirdi.
«О́kinishke qaraı, biz taǵy bir qalalyq aýrýhanada josparly gospıtalızasııany toqtatýǵa, ony kovıdtik stasıonarǵa aınaldyrýǵa májbúr bolyp otyrmyz. Sebebi ınfeksııa juqtyrǵandar sany azaımaı tur. Barlyq pasıent aýystyryldy. Aldaǵy ýaqytta olardy qalanyń respýblıkalyq jáne vedomstvolyq klınıkalaryna jiberemiz», dep túsindirdi qalalyq Qoǵamdyq densaýlyq saqtaý basqarmasynyń basshysy Tımýr Muratov.
Osylaısha qala turǵyndaryn aýrýhanaǵa jatqyzý stasıonarlardyń kezekshiligine sáıkes júrgiziledi. Sondaı-aq gınekologııadan bólek, táýlik boıy jáne kúndizgi stasıonarǵa josparly jatqyzýdy №2 kópbeıindi qalalyq aýrýhana da ýaqytsha toqtatady.
О́tken jazda №1 kópbeıindi qalalyq aýrýhana KVI naýqastaryn emdeıtin stasıonarǵa aýystyrylǵan bolatyn. Al tamyz aıynyń sońynda koronavırýstyq ınfeksııasy bar sońǵy naýqas shyǵarylǵan soń burynǵy profıldik jumysyna qaıta kirisken.
«Epıdemıologııalyq jaǵdaı nasharlap barady. Sońǵy aptada biz úsh aýrýhanany ınfeksııalyq stasıonarǵa aýystyrdyq. Qaladaǵy epıdemıologııalyq jaǵdaı týraly turǵyndardyń «ınfeksııa joıyldy, karantındi umytýǵa bolady» degen pikiri bizge aýyr tıedi. Elorda naýryz aıynan beri «qyzyl» aımaqtan shyqpaǵanyn taǵy da eske salyp óteıin. Bul kórsetkish turǵyndarymyzdyń sanıtarlyq talaptardy saqtaýdaǵy jaýapkershiligine tikeleı baılanysty», dep túıindedi vedomstvo basshysy.
Tımýr Muratov táýligine aýrýhanaǵa jatqyzylǵandardyń sany 300 adamǵa jetkenin atap ótti. Aıtýynsha pasıentter aýyr jáne óte aýyr kúıde túsip jatyr.
Esterińizge sala keteıik, ótken demalys kúnderi ınfeksııamen aýyrǵandardyń kóbeıýine baılanysty qosymsha eki aýrýhana ınfeksııalyq stasıonarǵa aýystyrylǵan: qalalyq psıhıkalyq densaýlyq ortalyǵy jáne Qorǵanys mınıstrliginiń bas áskerı klınıkalyq gospıtali. Al jalpy tósek-oryn sany: 300 oryn.
Nur-Sultan qalasy boıynsha 9 shilde kúni ınfeksııalyq stasıonarlarda barlyǵy 2 007 naýqas jatyr, bul tósek júktemesiniń 81%-yn quraıdy. Onyń ishinde 156 adam (139 KVI) reanımasııa bólimshesinde (júkteme 78%), 28 pasıent ókpeni jasandy jeldetý apparatynda jatyr. BMSK uıymdarynda 7 088 naýqas koronavırýstyq ınfeksııa boıynsha em alyp jatyr.
