Máselen, ótken jylmen salystyrǵanda qaraqumyq 300-den 405 teńgege deıin, qant 158-den 284 teńgege deıin, al suıyq maıdyń lıtri eki ese, ıaǵnı 325-ten 700 teńgege deıin qymbattady. Azyq-túlik baǵalaryna negizinen pandemııa jáne álemdik naryqtaǵy qymbatshylyq áser etedi, deıdi mamandar. Degenmen, oblystyń turaqtandyrý qorynda 313 tonna áleýmettik mańyzy bar azyq-túlik taýarlary saqtalýda. Aldaǵy kúnderi taǵy 272 tonna qant satyp alynady. Bul ónimder baǵany turaqtandyrý maqsatynda halyq kóp shoǵyrlanǵan dúkenderge, qalalarǵa, oblys aýdandaryna jetkiziletin bolady.
«Búgingi tańda ońtústik óńirlerden taýarlar jetkiziliminiń artýyna baılanysty azyq-túlik baǵalary tómendeýde. Baǵanyń tómendeýine ákeletin básekelestik bar. Mine, shildeniń ekinshi jartysynan bastap, ózimizdiń taýar óndirýshiler óz ónimderin shyǵara bastaıdy», dep túsindirdi Qaraǵandy oblysynyń Aýyl sharýashylyǵy basqarmasy basshysynyń orynbasary Syrym Boshpanov.
