Konkýrstyq irikteýden ótken stıpendıattar endi magıstratýra men doktorantýrada oqıdy nemese álemniń jetekshi joǵary oqý oryndarynda Qazaqstanda suranysqa ıe mamandyqtar boıynsha taǵylymdamadan ótetin bolady.
Stıpendııalar medısına, jaratylystaný jáne áleýmettik ǵylymdar, bilim berý, ınnovasııalar men jańa tehnologııalar, kreatıvti ındýstrııa, sondaı-aq ındýstrııalyq ınjenerııa baǵyttary boıynsha bólingen. 2021 jyly «Bolashaq» baǵdarlamasy boıynsha oqýǵa barlyǵy 1055 stıpendııa bólindi, onyń ishinde 555 stıpendııa magıstratýra, rezıdentýra, doktorantýra baǵdarlamalary boıynsha berildi. Sonymen qatar bıyl alǵash ret «Ǵalymdar» taǵylymdamasynyń jańa sanaty boıynsha 500 stıpendııa bólindi. Atalǵan sanat Memleket basshysy Q.Toqaevtyń tapsyrmasy boıynsha quryldy.
«Bul shyn máninde buryn-sońdy bolmaǵan shara. Endi jyl saıyn elimizdiń 500 ǵalymy álemniń jetekshi ǵylymı ortalyqtarynda taǵylymdamadan ótip, sonyń ishinde osy ortalyqtardyń zerthanalarynda birlesken zertteýler júrgize alady. Biz ǵalymdarymyzdy belsendilik tanytyp, shákirtaqy taǵaıyndaýǵa qatysýǵa shaqyramyz», dedi Bilim jáne ǵylym vıse-mınıstri Qýanysh Erǵalıev.
Esterińizge sala keteıik, «Bolashaq» halyqaralyq stıpendııasyn taǵaıyndaý konkýrsyna qatysý úshin qujattardy qabyldaý 4 mamyrdan bastalyp, 28 qazanǵa deıin jalǵasady.
