Halyqqa tazartylǵan altyn quımalardy satý jáne satyp alý baǵdarlamasyn Ulttyq Bank 2017 jyly iske qosqan. Baǵdarlama júzege asqaly jalpy salmaǵy 1,95 tonna 54 780 altyn quıma satylypty. «Jurtshylyqqa altyn quımalardyń 5, 10, 20, 50 jáne 100 gramdyq bes túri usynylady. Satyp alýshylar arasynda eń kóp suranysqa ıe bolǵany – 10 gramdyq quıma. Onyń jalpy satylymdaǵy úlesi 30% – 16 630 dana. Odan keıin 100 gramdyq quıma – 12 128 dana (22%) jáne 20 gramdyq quıma – 11 430 dana (21%), 5 gramdyq quıma – 8 650 dana (16%), 50 gramdyq quıma – 5 942 dana (11%). Negizinen ólshengen quımalar Almaty, Nur-Sultan jáne Atyraý qalalarynda suranysqa ıe», deıdi Ulttyq banktiń baspasóz qyzmeti.
Qazirgi ýaqytta altyn quımalardy Halyk Bank-te, Eýrazııalyq bankte, Jusan Bank-te, Bank SentrKredıtte, sondaı-aq banktik emes aıyrbastaý pýnktterinde satyp alýǵa jáne satýǵa bolady.
Bankter altyndy gramdap satyp jatqanymen halyqtyń kóbi onyń qandaı paıdasy baryna kóp mán bere bermeıdi. Mysaly, siz bankte depozıt ashyp, oǵan aqsha jınasańyz, teńge nemese dollarmen salynǵan jınaq naryq jaǵdaıyna baılanysty qubylýy múmkin. Mundaı kezde depozıt ıesi ne utylady, ne utady, ıaǵnı valıýtanyń qunyna baılanysty salym ne kóbeıedi, ne azaıady. Al altyn satyp alǵannyń upaıy qashan da túgel bolady. Bul da depozıtke aqsha salýdyń bir túri. Aqsha túrindegi depozıtten aıyrmashylyǵy, qundy metaldyń quny qymbattamasa, tómendeı qoımaıdy. Árıne, qunsyzdaný bolýy múmkin, biraq kóbine altynnyń baǵasy turaqty bolady. «Altyn quımalar – senimdi ınvestısııalyq qural. Álem boıynsha altyn ınflıasııaǵa qarsy qorǵanys quraly retinde qoldanylady. Onyń baǵasy altynnyń álemdik baǵasyna jáne ulttyq valıýtany aıyrbastaý baǵamyna táýeldi bolǵandyqtan naryqtaǵy quny ósip nemese túsip otyrady. Osy arqyly da satyp alýshylar qysqa merzim ishinde paıda kóre alady. Altyn quımalardań ıeleri bankter men banktik emes aıyrbastaý pýnkterinde kez kelgen ýaqytta altyndaryn keri ótkize alady. Baǵdarlama iske qosylǵaly jalpy salmaǵy 5,8 kg 177 quıma ǵana bankter men aıyrbastaý pýnkterine keri ótkizildi. Quımalardy kúnbe-kún satyp ala alý múmkindigi altyn quımalar naryǵynyń ótimdiligin qamtamasyz etetin basty faktor bolyp otyr», deıdi saýalymyzǵa jaýap bergen Ulttyq bank ókilderi.
Altyndy satyp alýdyń «dámin» bilip alǵandar bul metaldy jıi satyp alady. Osyǵan baılanysty satylǵan quımalardyń kólemi de jyl saıyn ulǵaıyp keledi eken. Ulttyq banktiń málimeti boıynsha, 2017 jyly baǵdarlama jańa iske qosylǵanda 1 786 dana (64,1 kg), 2018 jyly 3 925 (150,1 kg) dana, 2019 jyly 8 002 dana (328,8 kg), 2020 jyly 9 101 dana (404 kg), 2021 jyldyń qańtar-mamyr aılary aralyǵynda 4 767 dana (191,7 kg) altyn quıma satylǵan.
Sonymen qatar altyn quımalar banktik emes aıyrbastaý pýnkterinde de satylady. Baǵdarlama júzege asqaly aıyrbastaý pýnkteri arqyly barlyǵy 27 199 dana (0,81 tonna) altyn quıma satylǵan jáne satylymdaǵy kólemi jyldan-jylǵa ósip keledi. 2018 jyly 37 dana (0,81 kg), 2019 jyly 7 730 (140,6 kg) dana, 2020 jyly 11 998 dana (485,6 kg), 2021 jyldyń qańtar-mamyr aılary aralyǵynda 7 434 dana (182,4 kg) altyn quımasy satylypty.
Eger altyn quıyma satyp alǵa nıet etseńiz, onyń saqtalýyna da muqııat bolyńyz.
Ár altyn quıma qorǵanys elementterimen bezendirilgen. Quımalardyń beti aınadaı jyltyraq keledi, mıkromátin jáne bederli gýrtpen beınelenedi. Baǵaly metall arnaıy qaptamamen shyǵarylady. Quımany satyp alǵanda osy arnaıy qaptamasyn qosa alǵan jón. Ol quımany zaqymdanýdan qorǵap qana qoımaı, sonymen qatar altyn quımanyń ashylmaǵanyn jáne sapasy buzylmaǵanyn aıǵaqtaıtyn sapa sertıfıkaty retinde de júredi, sondyqtan quımany yjdahattylyqpen saqtap, oramasyn ashpaǵan jón, deıdi mamandar.
