Tiri kezinde-aq jasaǵan erlikteri halqyna ańyz bolyp taraǵan Halyq Qaharmany Baýyrjan Momyshuly: «Erdi el úshin, jigitti jurt úshin maqta», degen eken. Quıǵan aýylynyń azamaty Myrzaly Batyrhannyń is-áreketin búkil Balqash aýdanynyń jurtshylyǵy erlik dep, oǵan úlken qurmet kórsetip otyr. Aýdan ákimi Beıseǵalı Júnisov te: «Mundaı batyl áreket baǵalanýy kerek», – dep jaqynda oǵan Balqash aýdanynyń qurmetti azamaty ataǵyn berip, keýdesine tósbelgi taqty.
Tiri kezinde-aq jasaǵan erlikteri halqyna ańyz bolyp taraǵan Halyq Qaharmany Baýyrjan Momyshuly: «Erdi el úshin, jigitti jurt úshin maqta», degen eken. Quıǵan aýylynyń azamaty Myrzaly Batyrhannyń is-áreketin búkil Balqash aýdanynyń jurtshylyǵy erlik dep, oǵan úlken qurmet kórsetip otyr. Aýdan ákimi Beıseǵalı Júnisov te: «Mundaı batyl áreket baǵalanýy kerek», – dep jaqynda oǵan Balqash aýdanynyń qurmetti azamaty ataǵyn berip, keýdesine tósbelgi taqty.
Balyqshylardy er halyq dese de bolady. Olar kúnniń ystyq-sýyǵyna qaramaı, Balqash kóline motorly qaıyqtarymen jıi shyǵyp, aý salady. Keıde taban astynan jel turyp ketip, asaý tolqyndarǵa tap bolatyn kezderi de kezdesedi. Kólden sý marjandaryn tergen kásipqoı balyqshylardy ondaı qıynshylyqtar jasyta almaıdy. Qaıta sharbolat tárizdi shyńdala túsedi. Qaıyqtary aýyp ketip, sýǵa batyp ketetin kezderi de sırek bolsa da kezdesedi. Ondaı oqys oqıǵalar da olardyń óz kásipterine degen yntyzarlyǵyn bir sátke de báseńsite almaıdy.
Búkil aýdan halqy erlikke balap otyrǵan is-áreketti jasaıtyn kúni Batyrhan balyq aýlaýǵa shyqqanda jel baıaý edi. Balqash kóli ádetinshe terbelip qana jatqan-dy. Tús aýa jel kúsheıip, tolqyndar aq kóbigin shashyp, minez kórsete bastady.
Teńizdiń syry ózine belgili. Jýyq arada basyla qoımaıdy. Osyndaı oımen qaıtýǵa jınala bastaǵanda alystan sýǵa bir batyp, bir shyǵyp bara jatqan adamdardy kózi shalady. Oılanbastan qaıyǵyn solaı qaraı buryp barsa, qaıyqtary aýdarylyp, ómir úshin arpalysyp jatqan tórt adamdy kóredi. Birtindep, tórteýin de qaıyqqa shyǵaryp alypty. Olardyń ekeýi Almaty qalasynan kelgender eken. Bireýinde múlde jan joq tárizdi. Joldasy sýǵa batyrmaı, jandalbasalap júripti. Barlyǵy da qatty jaýrap qalypty.
Myrzaly Batyrhan óziniń osy áreketin eshqandaı erlikke balamaıdy. «Meniń ornymda kim de bolsa osylaı áreket eter edi, men tek olardy kezdeısoq baıqap qaldym», – deıdi ol. Al ajal tyrnaǵynan aman qalǵan tórteýi: «Sýǵa aǵyp, asaý tolqyndarmen arpalysyp júrgende, eki qaıyq qasymyzdan ótip ketti. Olar bizdi baıqamady ma, qaıyrylǵan joq. Biz Batyrhanǵa sheksiz rızamyz», deıdi.
Myrzaly Batyrhannyń osyndaı bıik adamı qasıeti, jasaǵan batyl is-áreketi kimge bolsa da úlgi bolýǵa turarlyq.
Marat QAShQYNBAEV.
Almaty oblysy,
Balqash aýdany,
Baqanas aýyly.
