«Kúltegin» túrki jazba eskertkishine arnalǵan nomınaly 1000 teńgelik banknot 2013 jyldyń 12 jeltoqsanynda aınalymǵa engen. Ulttyq banktiń qolma-qol aqsha aınalysy departamenti basqarmasynyń basshysy Dınara Daýtovanyń aıtýynsha, bul banknot – zańdy tólem quraly. Olardy basqa da estelik banknottar sekildi bank operasııalary men aýdarymdar kezinde jáne tólemniń kez kelgen túri boıynsha qabyldaýǵa mindetti. «Mundaı banknottardy qabyldaýdan bas tartqan jaǵdaıda kásipkerler aldymen eskertý alady. Bul «Ákimshilik quqyq buzýshylyq týraly» kodekstiń 206-babymen rettelip, zańdy buzǵandar ákimshilik jaýapkershilik arqalaıdy. Eger ataýly jaǵdaı̆ jyl ishinde qaı̆talansa, 5-ten 25 AEK mólsherinde aı̆yppul qarastyrylǵan. Eger sizden bul banknottardy qabyldamasa, Ulttyq banktiń aýmaqtyq fılıalyna ótinish bildirýińiz qajet. Banknotty qabyldaýdan bas tartý faktisin beınejazbaǵa túsirip alýǵa nemese jazbasha negizdeme talap etýge keńes beremiz», deıdi D.Daýtova.
Jalpy aınalymda «Kúltegin» banknotynan basqa da ataýly kúnder men oqıǵalarǵa arnalǵan estelik banknottardyń túrleri bar. Olardyń bárin estelik retinde saqtap qoıýǵa da, tólem túri retinde paıdalanýǵa da bolady deıdi mamandar.
Estelik banknottardy ekinshi deńgeıli bankter men «Qazposhta» AQ-tyń barlyq bólimshesinde, sondaı-aq Qazaqstan Ulttyq banki fılıaldarynda aýystyrýǵa jáne aıyrbastaýǵa bolady. Bul kýpıýralar tozyǵy jetkende ǵana aınalymnan shyǵarylatynyn esterińizge salamyz.
