Ǵylym tilinde «Urysaı 2 kóne qorǵandar toby» dep atalatyn úsh obany Batys Qazaqstan oblystyq tarıhı-ólketaný mýzeıiniń Tarıh jáne arheologııa bólimi qyzmetkerleri bıylǵy maýsym-shilde aılarynda qazyp, zerttedi. Qazba jumysyn tarıh jáne arheologııa bóliminiń aǵa ǵylymı qyzmetkeri Iаna Luqpanova júrgizdi.
Aıta keteıik, Shyńǵyrlaý aýdany aýmaǵyndaǵy Segizsaı, Elekshar obalary dúnıejúzilik arheologııa ǵylymynda tanymal, erekshe meken. Munda bizdiń zamanymyzǵa deıingi V ǵasyrlardan bastap ortaǵasyrlardy qamtıtyn qorǵandar kesheni saqtalǵan.
- Bıyl qazylǵan oba - aldyn ala boljam boıynsha baqsy kempirge tıesili. Ol óz taıpalastarynyń denesine túrli oıý-órnek, tatýırovka jasaýdyń sheberi bolǵan. Baqsy qartaıyp ólgen, súıekteriniń kórinisine qaraǵanda polıatrıt dertine shaldyqqan bolýy múmkin. Bul jerde tabylǵan qurbandyq tasy, júzdegen jebe ushy, basqa da buıymdar marqumnyń óz qoǵamynda úlken laýazym atqarǵanyn kórsetedi. Al onyń janynda qarý-jaraǵymen jerlengen jas jigit – baqsynyń tiri kezinde oqqaǵary, qorǵaýshysy bolǵan jaýynger bolsa kerek. Jer asty dúnıesinde de qojasyn qorǵap júrýi úshin óltirip, osylaı birge jerlegen sııaqty, - deıdi Shyńǵyrlaý aýdandyq tarıhı-ólketaný mýzeıiniń meńgerýshisi, ólketanýshy Tilegen Qalıev.
Bir ókinishti jaǵdaı, bul obalardyń bári de óz zamanynda tonalǵan, búlingen kórinedi. Biraq qalaı bolǵanda da tabylǵan buıymdardyń tarıh úshin mańyzy úlken. Tıisti laborotorııalyq zertteýlerden keıin bul qundy jádigerler Shyńǵyrlaý aýdandyq tarıhı-ólketaný mýzeıine tapsyrylyp, halyq nazaryna usynylmaq.
Aıta keteıik, sońǵy jyldary shyńǵyrlaýlyqtar óz ólkesiniń tarıhyn túgendeýge, ásirese budan buryn osy óńirden jan-jaqqa áketilgen jádigerlerdi aýdandyq mýzeıge qaıtarýǵa erekshe kúsh salýda. Bul iske Shyńǵyrlaý aýdandyq máslıhatynyń depýtaty, «Jańajer» sharýa qojalyǵynyń basshysy Álibek Taldybaev úlken úles qosyp júr eken. Joǵaryda atalǵan qazba jumysyna da Álibek Jumahanuly da atsalysqan.
Batys Qazaqstan
