Senbige qaraı zardap shekken aımaqtardyń kópshiligi qalpyna keltirildi, biraq sheneýnikter sýǵa batqan avtomobılder men júk kólikterinde qaza bolǵandardyń deneleri áli de tabylýy múmkin degen boljam aıtady.
Germanııa úkimetiniń málimdeýinshe, eki qalada kem degende 141 adam qaza boldy. Belgııanyń ulttyq daǵdarys ortalyǵy elde qaza tapqandar sany 27-ge jetkenin habarlady.
Germanııa prezıdenti Frank-Valter Shteınmaıer Soltústik Reın-Vestfalııadaǵy Erftstadtqa saparlap bardy, onda jumada aýqymdy qutqarý jumystary bastalǵan-dy.
«Azamattarymyz ómir boıy salǵan, jınaǵan múlikterinen, úılerinen, aıyryldy. Birneshe aptadan keıin shyǵyndy esepteý múmkin bolar», dedi Shteınmaıer.
Kóptegen aýdanda elektr qýaty jáne telefon baılanysy úzilgen. Sondyqtan habar-osharsyz ketken adamdar sanyn naqty aıtý múmkin emes.
Shteınmaıermen Erftstadtqa birge barǵan Soltústik Reın-Vestfalııa jeriniń gýbernatory Armın Lache zardap shekkenderge tez arada kómek uıymdastyrýǵa ýáde berdi. Onyń aıtýynsha, bılik aldaǵy kúnderi qalpyna keltirý jumystaryn qalaı qoldaý kerektigin talqylaıdy. Kansler Angela Merkeldiń kabıneti bul máseleni sársenbide talqylaýdy josparlap otyr.
Shekaranyń arǵy jaǵynda, Belgııanyń shyǵysynda temir jol jelileri men kóptegen úlken jol jabyldy.
Belgııa premer-mınıstri Aleksandr de Kroo men Eýropalyq komıssııanyń prezıdenti Ýrsýla fon der Lıaıen senbi kúni tańerteń eldiń eń kóp zardap shekken aımaqtaryna bardy.
«Úılerinen aıyrylǵan jáne bar jıǵanyn joǵaltqan adamdarmen kezdeskende meniń júregim syzdady. Olarǵa Eýropa ózderimen birge ekenin jetkizdim. Jaqyn arada kómek kórsetiledi», dep jazdy Fon der Lıaıen áleýmettik jelidegi óz paraqshasynda.
Zardap shekken elder qatarynda Shveısarııa, Fransııa men Nıderland ta bar.
