«Biz talantty jastarymyzdyń tek «Slavıan bazary» baıqaýynda ǵana emes basqa saıystardan jeńispen kelip jatqany týraly maqtanyshpen aıtamyz. Árıne, bul baıqaýdyń orny bólek. Jalpy óner baıqaýlary birneshe sanatqa bólinedi. Sonyń ishinde «Slavıan bazary» úzdik halyqaralyq baıqaýlardyń biri bolyp sanalady. Jýyrda ǵana bizdiń jas dombyrashylarymyz Ulybrıtanııadan jeńispen oraldy. Sonymen qatar klassıkalyq janrda án aıtatyn ánshilerimiz de elimizge túrli baıqaýlardan jeńis ákelip júr. Osy oraıda esime túsip otyr, klassıkalyq án oryndaý boıynsha tórealqalar men Italııanyń opera ánshileri opera janrynda án aıtýdy Qazaqstanda úırený kerek degen-tuǵyn. Olar bizdiń ártisterdiń ónerine tańqalystaryn jasyrmady», dedi A. Raıymqulova ZOOM arqyly ótken baspasóz máslıhatynda.
Sondaı-aq mınıstr otandyq jas ónerpazdardyń túrli halyqaralyq jobalarǵa qatysyp, elimizge jeńispen oralatyny qýantatynyn aıtty.
«Jeńiske jetýde memlekettik qoldaý men pedagogterdiń tynymsyz eńbeginiń arqasy. Árıne, Imanbek sekildi talantyn ózdiginen moıyndatyp jatqan ónerpazdardyń baryn joqqa shyǵarmaımyz. Biz jas talanttarǵa qoldaý kórsetýge árdaıym ázirmiz», deıdi ol.
Aıta ketsek, buǵan deıin QR Mádenıet jáne sport mınıstri Aqtoty Raıymqulova qazaqstandyq jas ánshi, «Slavıan bazary» halyqaralyq baıqaýynyń Gran-prı ıegeri Rýhııa Baıdúkenovany jeńisimen quttyqtaǵan bolatyn.
