Atalǵan máseleni sheshý maqsatynda endi óńirde ár senbi saıyn shóp jármeńkesi uıymdastyrylatyn boldy. Jambyl oblysynyń ákimi Berdibek Saparbaev arnaıy úndeý joldap, qajetti shópti jınap alý úshin barlyq ishki resýrstardy paıdalanýdy tapsyrǵan.
«Búgingi tańda taý ańǵarlarynan, saı-sala, ózen arnalarynan qosymsha pishen daıyndaý jumystary bastalyp ketti. Bıyl Sarysý, Moıynqum jáne Talas aýdandaryndaǵy Shý, Talas jáne Asa ózenderiniń boıyndaǵy ónim ótken jylmen salystyrǵanda joǵary bolǵandyqtan, iri sharýa qojalyqtaryna shópti atalǵan aýdandardan oryp alý usynyldy. Budan bólek, keıbir aýdandaǵy sharýalar óz menshigindegi saı-salalardy halyqqa bólip berip otyr. Osylaısha shóp daıyndaý jumystary Jýaly jáne taǵy bir-eki aýdanda uıymdastyrylýda. Sondaı-aq, bizdiń basqarma tarapynan ótken senbiden bastap barlyq aýdan ortalyqtarynda «jem-shóp satý» jármeńkesin ótkizý qolǵa alyndy», deıdi oblystyq aýyl sharýashylyǵy basqarmasynyń basshysy Qaırat Amanov.
Mal azyǵy baǵasynyń negizsiz sharyqtap ketýiniń aldyn alý maqsatynda uıymdastyrylǵan jármeńke budan bylaı barlyq aýdanda ár senbi saıyn ótkiziletin bolady. Máselen, ótken jármeńkede Moıynqum aýdanyna jetkizilgen bir baý jońyshqa 1000, pishen 500, bir orama shóp 3500 teńgeden ótkerilgen. Jalpy, jármeńkege 1600 baý pishen, 1000 baý jońyshqa jáne 500 orama shóp jetkizilgen. Sol sııaqty, T.Rysqulov aýdanynda da ótken jármeńkede 36 tonna jońyshqa, 56 tonna pishen jáne 28 tonna saban satylǵan.
Jambyl oblysy
