Qomaqty qarjy qazynaǵa qaıtaryldy

Memlekettik satyp alý portalyna monıtorıng júrgizgen departament mamandary jarty jyl ishinde 580 mln teńgeden astam qarjyny bıýdjet qorjynyna qaıtaryp bergen. Prevensııa jáne parasattylyq basqarmasynyń basshysy Rústem Bolattyń aıtýynsha, jyl basynan beri 174 lot boıynsha 100-den astam tapsyrys berýshige usynymdar jo­ǵary baǵamen jiberilip otyrǵan.

– Biryńǵaı satyp alý terezesi portalyn monıtorıngileý, eń aldymen, sybaılas jemqorlyqtyń aldyn alý jáne der kezinde eskertý tetigi bolyp sanalady. Sondaı-aq bıýdjetti ıgerýdiń bastapqy kezeńinde sybaılas jemqorlyq táýekelderin joıý­ǵa múmkindik beredi. Bul salyq tóleý­shilerdiń aqshasyn únemdep qana qoımaı, laýazymdy tulǵalardyń osy qarajatty utymdy josparlap, ıge­rýdegi jaýapkershiligin arttyrýǵa múm­­­kindik beredi. Sondyqtan osy ba­ǵytta jumysty sapaly jalǵastyrý qajet, – dedi oblystyq Sybaılas jem­qorlyqqa qarsy departamenttiń basshysy Qýanysh Bekbasov.

Jıyn barysynda Memleket bas­shysynyń 2020 jylǵy 1 qyrkúıek­te­gi Joldaýyn iske asyrý jónindegi Jal­py­ulttyq is-sharalar josparyn oryn­daý barysynda oblys boıyn­sha 500-den astam memlekettik mekemede sybaılas jemqorlyq táýekelderin anyqtaý maqsatyndaǵy ishki taldaý sharalary júrgizilgeni aıtyldy. Olardyń ishinde qala jáne aýdan ákimdikteri, oblystyq basqarmalar, sondaı-aq aýyldar men aýyldyq ok­rýg ákimderiniń apparattary bar. Nátıjesinde, 613 sybaılas jem­qor­lyq táýekeli anyqtalyp, memle­ket­tik organdarǵa anyqtalǵan keleń­siz­dikti joıý týraly 1 myńǵa jýyq usy­nymhat jiberilgen.

– Bul sharalar salalyq zańdardyń kemshin tustaryn anyqtaýǵa, sondaı-aq memlekettik organdar qyzmetindegi ishki olqylyqtardy der kezinde kóre bilýge múmkindik beredi. Sondaı-aq aldaǵy ýaqytta memlekettik or­gan­dardaǵy sybaılas jemqorlyq táýe­kelderiniń týyndaý múmkindigin aı­tar­lyqtaı tómendetýi tıis, – dedi departament basshysy.

Qýanysh Bekbasov aldaǵy ýaqyt­ta sy­baılas jemqorlyqtyń al­dyn alý, eskertý sharalaryna basym­dyq be­­ri­letinin atap ótti. Departament bas­shysynyń sózinshe, jyl basynan beri túrli deńgeıdegi memleket­tik or­­gandarǵa qylmystyń jáne basqa da qu­qyq buzýshylyqtardyń sebep-saldar­laryn joıý jóninde 27 usynyshat jiberilgen. Olardyń beseýi jekelegen basshylarǵa qatys­ty eken.

Alǵashqy jartyjyldyqta atal­ǵan departamenttiń mamandary 42 qylmystyń betin ashqan. Onyń 39-y sybaılas jemqorlyqqa qatysty qyl­mys sanalady. Bul isterdi tergeý bary­synda qylmyskerlerdiń memleketke 707 mln teńge zııan keltirgeni anyqtalyp otyr.

– Búginge deıin 706 mln teńge qaı­ta óndirilip alyndy. 22 adam qyl­mystyq jaýapkershilikke tartyl­dy. Onyń ishinde 2 oblystyq, 3 qala­lyq jáne 2 aýdandyq deńgeıdegi 7 memlekettik mekemeniń basshysy bar, – dedi Q.Bekbasov.

Qostanaı oblysy