О́ńirge sapary barysynda Úkimet basshysy oblys ákimi Serikbaı Trumovtyń óńirde mal sharýashylyǵy salasynda qalyptasqan jaǵdaı jáne qurǵaqshylyqtan zardap shekken aýdandardy jemshóppen qamtamasyz etý boıynsha júrgizilip jatqan jumystar týraly baıandamasyn tyńdady.
Oblys ákiminiń dereginshe, Aqtóbe, Batys Qazaqstan jáne Qostanaı sekildi kórshiles oblystardan shóp jetkizý jáne ótkizý jolǵa qoıylǵan. 1200 tonnadan astam arpa ákelindi, olar fermerlerge naryqtyq baǵadan tómen baǵamen satyldy. Úkimet Mańǵystaý oblysynda maldyń analyq basyna arnalǵan azyqqa jumsalǵan shyǵyndardy ishinara óteýge 1,9 mlrd teńge bóldi. Premer-Mınıstrdiń tapsyrmasy boıynsha fermerlik sharýashylyqtarǵa qoljetimdi baǵamen kólemi 114,7 myń tonna daıyndalǵan shópti satyp alý jáne jetkizý úshin turaqtandyrý qoryn qalyptastyrýǵa, sondaı-aq «Azyq-túlik kelisimshart korporasııasy» UK» AQ arqyly 56,3 myń tonna jemshóp (kebek) satyp alýǵa qosymsha qajetti qarajat bólinedi.
Budan keıin Premer-Mınıstr Asqar Mamın Qazaqstandaǵy alǵashqy TETYSBLU taqyryptyq parkiniń ashylý rásimine qatysty. Obekt Aqtaý qalasynyń týrıstik aımaǵynda ornalasqan, onda BluPower, Watermania, Snorri syndy Ortalyq Azııada teńdesi joq attraksıondar jáne 30-dan astam biregeı attraksıon bar.
Úkimet basshysy Aqtaý qalasynyń týrıstik aımaǵyn damytý jobalary qalaı júzege asyrylyp jatqanyn tekserdi. Atap aıtsaq, golf klýby, saýda qatarlary, vıllalary men apartamentteri bar Hilton jáne Fairmont brendteriniń qonaq úıleri, Aqualina Resort. Qyrkúıek aıynda golf klýbynyń, saýda qatarlarynyń, vıllalar men Fairmont qonaqúıiniń qurylysy aıaqtalady dep josparlanǵan.
Sondaı-aq A.Mamın osy jyldyń qazan aıynda aıaqtalýǵa tıis týrıstik aımaqtyń tynys-tirshiligin qamtamasyz etýge arnalǵan, uzyndyǵy 49 km qosymsha sý taratqyshtyń jáne uzyndyǵy 33 km KTQ-1-den KTQ-2-ge deıingi qysymdy káriz kollektorynyń qurylysymen tanysty.
Premer-Mınıstr josparlanǵan nysandardyń jáne kólik, ınjenerlik-kommýnıkasııalyq ınfraqurylymynyń qurylysyn ýaqtyly aıaqtaýdy tapsyrdy.
Premer-Mınıstrge óńirdegi balyq sharýashylyǵyn damytý, onyń ishinde bekire tuqymdas balyq túrlerin ósirý zaýyty qurylysynyń perspektıvalyq jobalary, Kaspıı teńizinde balyq aýlaýdy uıymdastyrý týraly baıandaldy. Sonymen qatar A.Mamın balyq jemin óndirý jáne otyrǵyzý materıalyn óndirýge arnalǵan ınkýbasııalyq sehty qurýdy qosa alǵanda, jylyna 30 myń tonnaǵa deıin balyq ósirý jáne qaıta óńdeý boıynsha zamanaýı tehnologııalardy engize otyryp, «Injý Marjan» shyǵanaǵynda balyq ósirý keshenin qurý jobasymen tanysty. «Aqtaý teńiz porty» AEA-da Úkimet basshysyna jumsaq qaptama ydys, polımerlik qaptama, sorǵy shtangalary men mýftalar, kaýstıkalyq soda jáne quramynda hlory bar ónimder jáne t. b. óndirý jónindegi ınvestısııalyq jobalar tanystyryldy.
Premer-Mınıstr «Quryq» parom keshenin jáne «Aqtaý» teńiz portyn da aralap kórdi. Munda Qazaqstannyń tranzıttik-kólik áleýetin damytý máseleleri sóz boldy. Atap aıtqanda, júkterdi aýystyryp tıeý qýaty jylyna 6 mln tonnany quraıdy.
Úkimet basshysy uzyndyǵy 24 shaqyrym bolatyn Aqtaý-Áýejaı birinshi sanattaǵy avtomobıl jolynyń salyný barysyn, sondaı-aq uzyndyǵy 4,5 shaqyrym bolatyn «Honda» ortalyǵynan О́mirzaq aýylynyń T-tárizdi qıylysyna deıingi qalalyq avtomobıl jolyn rekonstrýksııalaý barysyn tekserdi. Atalǵan ýchaskelerdegi barlyq jumys túrin tolyq aıaqtaý bıylǵy jyldyń birinshi qyrkúıegine josparlanǵan.
A.Mamın «Transtelekom» AQ Derekterdi óńdeý ortalyǵynyń jumysymen de tanysty. Joba quny – 6,8 mlrd teńge. Ortalyq Tier III deńgeıiniń qaýipsizdik jáne senimdilik standarttaryna sáıkes keledi. Osyndaı ortalyqtar Qazaqstannyń 9 qalasynda: Aqtaý, Atyraý, Aqtóbe, Oral, Qaraǵandy, Jezqazǵan, Qyzylorda, Nur-Sultan jáne Almaty shaharynda bar. Derekterdi óńdeý ortalyqtary klıenttik serverlerdiń úzdiksiz qyzmetin qamtamasyz etýge, sıfrlandyrýdy engizýge tehnologııalyq negiz bola alady.
