Taıaýda oblys ortalyǵynan shalǵaı jatqan Qarajal qalasynda 215 otbasy turǵyn úımen qamtamasyz etildi. Mundaı ıgi is bos turǵan kópqabatty úıdi qaıta qalpyna keltirýdiń nátıjesinde múmkin boldy.
Budan bólek qalada jergilikti bıýdjet qarjysyna bos turǵan jeti kommýnaldyq páterge jóndeý jumystary júrgizildi. Bul 32 otbasyn turǵyn úımen qamtamasyz etýge múmkindik berdi.
Qarajal qalasynyń turǵyn úı-kommýnaldyq sharýashylyǵy, jolaýshylar kóligi, avtomobıl joldary, qurylys jáne turǵyn úı ınspeksııasy bólimi basshysynyń orynbasary Nursultan Saýtbaev byltyr qaıta qurý jumystary bastalǵan úılerdiń qurylysy osy jyldyń qazan aıynda aıaqtalatynyn aıtady.
– Qaıta qurý nátıjesinde 215 otbasy turǵyn úımen qamtamasyz etiledi, bul kezekti 50%-ǵa tómendetýge múmkindik beredi. Búginde Qarajal-Jáırem aımaǵy boıynsha memlekettik turǵyn úı qorynan turǵyn úı alýǵa kezekte 425 adam tur, – deıdi N.Saýtbaev.
Aıta ketý kerek, barlyq kommýnıkasııa respýblıkalyq jáne qalalyq bıýdjet esebinen jóndeledi. Úıler ortalyq jylýǵa qosylady. Jalpy, qaladaǵy mańyzdy máseleniń biri – qalpyna keltirýge jatpaıtyn bos turǵan úılerdi buzý. О́tken jyly dál osyndaı segiz úıdi buzý jumystary aıaqtalǵan. Sonymen qatar Qarajal qalasy men Jáırem kentinde bos turǵan toǵyz úıdi buzýǵa smetalyq qujattamany ázirleý boıynsha jumystardy bastaý josparda bar eken.
Munyń syrtynda, oblysta Qazaqstan musylmandary dinı basqarmasy janyndaǵy «Zeket» qaıyrymdylyq qory muqtaj jáne kópbalaly otbasylarǵa, sondaı-aq erekshe bala tárbıelep otyrǵan otbasylarǵa páterler men úıler satyp aldy. Sonyń nátıjesinde bıyl «El úlesi – páterge!» jobasy aıasynda Qaraǵandy oblysynda 13 otbasy turǵyn úımen qamtamasyz etilgen bolatyn.
«Zeket» qaıyrymdylyq qorynyń Qaraǵandy oblysyndaǵy jaýapty ókili Muhıt Jarymbetov mundaı ıgi sharýalardyń aldaǵy ýaqytta da jalǵasyn tabatynyn jetkizdi.
– Bizge az qamtylǵan otbasylardan ótinishter kelip túsýde. Bizdiń komıssııa bul adamdardyń turǵyn úıge qanshalyqty muqtaj ekenderin tekseredi. Sodan keıin biz páterlerdi ala bastaımyz. Jaqynda Qarajalda bir otbasyn baspanamen qamtamasyz ettik. Mundaı ıgi isterdi odan ári jalǵastyramyz, – deıdi ol.
Aıta ketý kerek, az qamtylǵan otbasylar úshin qaıyrymdylyq arqyly turǵyn úı satyp alýdy maqsat etetin «El úlesi – páterge!» jobasy 2018 jyly qurylǵan. Jalpy, osy joba aıasynda respýblıkada 400-den astam otbasy turǵyn úımen qamtamasyz etilgen eken.
Baspana máselesin aıtqanda, taıaýda bolǵan myna qaıyrymdy isti de nazardan tys qaldyrýǵa bolmaıdy. Qarqaraly aýdanyndaǵy Borlybulaq bólimshesiniń turǵyndary Túrkistan oblysynan kóship kelgen eki otbasyna úı tartý etken. Qyrǵyz aýyldyq okrýgine qarasty Borlybulaq bólimshesinde turǵyndarynyń sany 225 adamdy quraıtyn 47 otbasy turady.
Bólimshede jalpy orta bilim beretin mektep bar. Soǵan qaramastan, jas otbasylar men jastar aýylda turaqtamaı júr eken. Mektep jasyndaǵy balalardyń jetispeýshiligi jergilikti mekteptiń orta mektepten bastaýysh mektepke aýysýyna qaýip tóndirýi múmkin. Bul máseleni sheshý úshin jergilikti atqarýshy organdar Túrkistan oblysyndaǵy otbasylardy óz aýyldaryna kóship kelýge shaqyrǵan.
Jańa jerde baspanaly bolǵan turǵynnyń biri – Muzafar Mahamadalıev. Ol – bes bala tárbıelep otyrǵan úlken otbasynyń ıesi. Balalarynyń úlkeni 18 jasta, qalǵan tórteýi áli mektepte oqıdy eken.
– Kóshkenge deıin biz Túlkibas aýdanynda turdyq. Bizdiń úıimiz jáne jumysymyz boldy. Biraq onda halyq kóp, tıisinshe, mal da kóp. Al jaıylymdyq jerler jetispeıdi. Bizge Qaraǵandy oblysyna kóshýdi usynǵanda, oılanǵanymyz ras edi. Aldymen osynda kelip, jergilikti adamdarmen tanystyq. Barlyǵy unaǵan soń, kóshýge bel býdyq. Munda halyqtyń tyǵyzdyǵy Túrkistan oblysyndaǵydaı emes, jer de jetkilikti. Jumys ta bar, – deıdi ol.
Qyrǵyz aýyldyq okrýginiń ákimi Baýyrjan Qapashevtyń aıtýynsha, ońtústikten kelip qonystanǵan eki otbasyna arnalǵan úı jóndeýden ótkizilgen. Túrkistandyq azamattar bolashaqta jylyjaı salyp, kókónis ósirýmen aınalyspaqshy. Al jergilikti turǵyndar bolsa, usaq maldy tegin berýge nıet tanytyp otyr.
Taıaýda onlaın formatta ótken jastar isi jónindegi keńestiń otyrysynda Qaraǵandy oblysynyń ákimi Jeńis Qasymbek qazirgi tańda jas otbasylardy baspanamen qamtamasyz etýdiń basty nazarda ekenin aıtty.
Atalǵan jıynda jastardy turǵyn úımen qamtamasyz etý jáne óńirdiń jastar resýrstyq ortalyqtarynyń qyzmeti máseleleri talqylandy. Búginde oblysta 8 myńǵa jýyq jas turǵyn úı kezeginde tur.
Jastar saıasaty máseleleri basqarmasynyń basshysy Birjan Álimjanov turǵyn úı alýǵa kezekte turǵan jastardyń kópshiligi jetim balalar jáne ata-anasynyń qamqorlyǵynsyz qalǵan balalar sanatyna jatatynyn jetkizdi.
– Oblys ákiminiń tapsyrmasy boıynsha 2020-2022 jyldarǵa arnalǵan turǵyn úımen qamtamasyz etýdiń keshendi jospary ázirlendi. Birinshi jartyjyldyqta 72 páter berildi, – dedi ol.
Sondaı-aq otyrysta jas mamandar úshin qoljetimdi ıpoteka týraly másele kóterildi. Qazir jumys ólshemsharttaryn anyqtaý úshin «Otbasy bankpen» kelissózder júrgizilýde.
О́ńir basshysy «Jastar ıpotekasy» oblystyq baǵdarlamasy jas qaraǵandylyqtardy qoldaýdyń mańyzdy quralyna aınalǵanyn atap ótti. Osy oraıda ol ıeleri jeńildetilgen ıpotekalyq nesıelendirýge úmittene alatyn mamandyqtar tizimin muqııat qarastyrýdy tapsyrdy.
Qaraǵandy oblysy
