Eske sala keteıik, aýyl ákimderin tikeleı saılaý máselesi – Memleket basshysy Qasym-Jomart Toqaevtyń saıası reformalarynyń mańyzdy tustarynyń biri. Bul týraly Prezıdent óziniń «Jańa jaǵdaıdaǵy Qazaqstan: is-qımyl kezeńi» atty byltyrǵy Joldaýynda aıtyp, tapsyrma bergeni belgili. Taıaýda osyǵan oraı ótkizgen keńeste de «bul – biz úshin strategııalyq máni aıryqsha mindet. Azamattarymyz tuńǵysh ret jergilikti atqarýshy bıliktiń basshysyn tikeleı saılaý múmkindigine ıe bolmaq. Biz buǵan birtindep, josparly túrde keldik», dep atap kórsete otyryp, aldaǵy saıası naýqannyń mańyzyna erekshe toqtalǵan bolatyn.
Rasynda da, el ishinde osy naýqanǵa jiti daıyndyq júrgizildi. Ákim saılaýy ótetin aýyldar naqtylandy, olardyń sany – 730. Zańnamaǵa sáıkes saılaýaldy jumystar atqaryldy. Al ótken 14 shildede aýdandyq mańyzy bar qalalardyń, aýyldardyń, kentterdiń jáne aýyldyq okrýgterdiń ákimdigine kandıdattardy tirkeý aıaqtalyp, el boıynsha saılaýǵa qatysý úshin jalpy 2582 adam óz kandıdatýrasyn usynǵany, onyń 2297-si nemese 88,9%-y qajetti tirkeýden ótkeni belgili boldy. Bul týraly Prezıdenttiń kómekshisi Erlan Qarın Telegram arnasynda jazdy. Sondaǵy keltirilgen derekterge qaraǵanda, saıası partııalardan 878 adam (38,2%) usynylsa, tirkelgenderdiń 1419-y nemese 61,8%-y ózin ózi usynǵandar eken. Iаǵnı ákim saılaýy el azamattarynyń tarapynan eleýli qyzyǵýshylyq týdyrǵan. Osyǵan oraı, Qazaqstan halqy bul saılaýdy da abyroımen ótkizip, árbir saılaýshy óz tańdaýyn jasaıdy dep senemiz. «Egemen Qazaqstan» gazeti saılaý barysyn jiti nazarda ustaıtyn bolady.
