Rysqalı Ábdikerov Qaraǵandy oblysyndaǵy Balqash qalasyndaǵy orta mekteptiń qyzmetimen jáne jańa oqý jylyna daıyndyq barysymen tanysty. Sondaı-aq kópsalaly kort pen sport alańyn, sport zaly men oqý kabınetterin aralap kórdi. Senator pándik kabınetterdi kompıýterlik tehnıkamen jáne oqý ádebıetimen jabdyqtaý máselelerine nazar aýdardy. Sondaı-aq oqý ornynyń qasbetin jóndeý qajettigin aıtty.
Qazirgi kezde taýarlarǵa, onyń ishinde, birinshi kezekte qajet ónimderge baǵanyń ósýi turǵyndardy tolǵandyryp otyr. Rysqalı Ábdikerov Balqash qalasyndaǵy jaǵdaıdy jan-jaqty zerdeleý úshin áleýmettik dúkenderge bardy. Búgingi tańda qalada 13 azyq-túlik pavılony men kommýnaldyq dúken jumys isteıdi. Jergilikti bılik pen olar áleýmettik mańyzy bar ónimderdiń baǵasyn ustap turý boıynsha memorandýmǵa qol qoıǵan bolatyn. Depýtat atqarylyp jatqan jumystardy kúsheıtý jóninde birqatar naqty usynys aıtyp, munyń qala turǵyndary úshin asa mańyzdy ekenin atap ótti. Ákimdik ókilderimen kezdesý barysynda Balqash qalasynda kommýnaldyq bazar ashý týraly da sóz boldy.
Senator qala turǵyndarymen de kezdesip, olardy tolǵandyratyn máselelerdi, eldi mekenniń damý keleshegi jáne basqa da ózekti taqyrypty talqylady.
Dana Nurjigitova Almaty qalasynda birqatar kezdesý ótkizdi. N.Sas atyndaǵy Balalar men jasóspirimder memlekettik akademııalyq orys teatryndaǵy kezdesýde teatr ónerin damytýdyń negizgi máseleleri kóterildi. Sondaı-aq senator teatr repertýaryn jaqsartý jáne shyǵarmashylyq ujymdy qazirgi zamanǵy jaǵdaıǵa oraı damytý jóninde birqatar usynys aıtty.
Senat depýtaty áıgili teatr trýppasy men ujymynyń Elbasy men Memleket basshysynyń mádenı jáne gýmanıtarlyq saıasatyn ilgeriletý isine qosqan mańyzdy úlesin atap ótti.
Dana Nurjigitova sapar barysynda ALMAU ýnıversıteti men Almaty memlekettik energetıka jáne elektrondy tehnologııalar kolledjinde boldy. Júzdesýler kezinde «Jas maman» jobasy talqylanyp, jas mamandardyń eńbek naryǵyndaǵy halyqaralyq talaptarǵa sáıkestigi máselesi sóz boldy.
Senator Q.Sátbaev atyndaǵy ýnıversıtettiń kelesi oqý jylynyń bastalýyna daıyndyq deńgeıimen tanysyp, oqý korpýstary men jataqhanalardy aralap kórdi. Ýnıversıtet basshylyǵymen kezdesý barysynda depýtat vaksınalaý prosesin sapaly uıymdastyrýdyń mańyzdylyǵyn atap ótti.
Depýtat sonymen qatar Almaty JEO-da da boldy. Kezdesý barysynda el Prezıdentiniń JEO bloktarynyń biriniń jumysyn 2023 jylǵa deıin gazǵa kóshirý jónindegi tapsyrmasynyń oryndalý barysymen tanysty. Sondaı-aq qaldyqtardy qaıta óńdeý jónindegi jobany iske asyrý jáne oǵan ınvestısııa tartý máseleleri talqylandy.
Lázzat Súleımen Almaty oblysyna sapary barysynda Qaratal aýdanynyń Úshtóbe qalasyndaǵy Ilııas Esenberlın jáne Kemel Toqaev atyndaǵy jalpy bilim beretin mektepterde bolyp, oqý oryndarynyń materıaldyq-tehnıkalyq jabdyqtalýyna jáne qaýipsizdik máselelerine nazar aýdardy.
Senat depýtaty jyljymaly medısınalyq vaksınalaý keshenine kelgen azamattarmen kezdesti. Aýdan ákimdiginde turǵyndarǵa kórsetiletin memlekettik qyzmetter sapasymen tanysty.
«Birinshi kezekte, árbir salada azamattardyń konstıtýsııalyq quqyqtarynyń qorǵalýy mańyzdy. Prezıdent «Halyq únine qulaq asatyn memleket» tujyrymdamasyn jarııa etkenin ózderińiz bilesizder jáne ony iske asyrý basym baǵyt bolyp otyr. Osyǵan baılanysty bılik árqashan halyqqa jaqyn bolyp, azamattardyń problemalaryn estip qana qoımaı, olardy zań aıasynda sheshýdiń barlyq jolyn qarastyryp, pármendi sharalar qabyldaýǵa tıis. Biz de osy baǵytta jumys istep jatyrmyz», dedi Lázzat Súleımen.
Senat depýtaty oblys ortalyǵyndaǵy qalalyq sot, prokýratýra, ishki ister bólimi jáne Prezıdent janyndaǵy Memlekettik basqarý akademııasynyń Almaty oblysy boıynsha fılıalynyń basshylarymen kezdesý ótkizdi. Onda Prezıdent Qasym-Jomart Toqaevtyń Qazaqstan halqyna Joldaýyndaǵy quqyq qorǵaý organdary, prokýratýra jáne sot arasyndaǵy ókilettikter men jaýapkershilik aıasyn ajyrata otyryp, qylmystyq prosestiń úsh býyndy úlgisin engizý jónindegi tapsyrmalaryn iske asyrý máseleleri talqylandy. Kezdesý barysynda tikeleı saılaý ótkizilgennen keıin aýyldyq okrýg ákimderin oqytý máselesi de qaraldy.
Olga Býlavkına Shyǵys Qazaqstan oblysynyń birqatar aýdanyndaǵy medısınalyq mekemelerdiń qyzmetkerimen kezdesti.
Senat depýtaty Altaı aýdanyna bolǵan kezde Senattyń zań shyǵarý qyzmeti týraly aıta kelip, medısına qyzmetkerleriniń áleýmettik jáne eńbek jaǵdaılaryn jaqsartýǵa tikeleı qatysty zańdar týraly habardar etti. Ol el Prezıdentiniń Joldaýyn iske asyrýdyń basym baǵyttarynyń biri – pandemııa saldaryn eńserý jáne qazaqstandyqtardyń densaýlyǵyn nyǵaıtý ekenin atap ótti.
«Pandemııa densaýlyq saqtaý jáne bilim berý salasyndaǵy qazirgi problemalardy aıqyndady jáne osy salalarda jańa reformalar júrgizý qajettigin kórsetti. Qazirgi kezde dáriger mamandardyń jetispeýshiligi baıqalady, óńirlerde kadrlardy oqytýǵa grantpen qarjylandyrý qajet. Ulttyń densaýlyǵy men ál-aýqaty bizdiń bolashaǵymyz ekenin jáne memlekettiń damýy soǵan baılanysty túsinýimiz kerek», dedi Olga Býlavkına.
Senator koronavırýs pandemııasymen kúres kezindegi dárigerlerdiń jumysyna basa nazar aýdaryp, olarǵa qajyrly eńbegi úshin alǵys aıtty, sondaı-aq vaksınalaý máselesin talqylady.
Olga Býlavkına óńirdegi kópbalaly otbasylardyń turǵyn úı máseleleri qalaı sheshilip jatqanymen de tanysty. Ol júzege asyrylyp jatqan «Bir qabatty Shyǵys» jobasyn joǵary baǵalady. Memleket-jekeshelik áriptestik qaǵıdatyna negizdelgen joba kópbalaly otbasylardyń turǵyn úı jaǵdaılaryn jaqsartýǵa múmkindik beredi. Senator búgingi tańda kópbalaly otbasylardy turǵyn úımen qamtamasyz etý – memlekettiń basym mindetteriniń biri ekenin atap ótti.
Senator fermerlermen kezdesý barysynda jergilikti sharýalardy tolǵandyrǵan máselelerdi bildi. Olar aýyl sharýashylyǵyn damytýǵa baǵyttalǵan sýbsıdııalardy bólý júıesin ózgertý qajettigin aıtty.
Olga Býlavkına sondaı-aq Qoǵamdyq keńester, ardagerler keńesi, etnomádenı birlestikter múshelerimen de kezdesti. Bul kezdesýlerde ákimderdi saılaý jáne Qoǵamdyq keńesterdiń, Qazaqstan halqy oblystyq assambleıasynyń, Analar men aqsaqaldar keńesteriniń jumysy máseleleri qaraldy. Sonymen qatar aýrýhanalardy jabdyqtaý, densaýlyq saqtaýdyń aqparattyq júıelerin ıntegrasııalaý jáne jeńildikti dári-dármekter berý máseleleri de kóterildi.
Depýtat aımaq turǵyndary kótergen barlyq másele óziniń aldaǵy zań shyǵarý qyzmetiniń arqaýyna aınalatynyn aıtty.
