– Bizdiń qyzmetkerler óńirdegi barlyq ózen-kól, sý aıdyndaryn baqylaı almaıdy. Bul múmkin de emes. Turǵyndarǵa saqtanyp, tek ruqsat etilgen jerlerde sýǵa túsýge keńes beremiz. Biraq qansha eskertý berilse de, adamdar ruqsat etilmegen oryndarda sýǵa túsedi, – deıdi TJD qutqarý qyzmetiniń bas mamany Meırambek Batyrqulov.
Qazir oblysta 33 jaǵalaý bar, onyń 17-si – kommýnaldyq, 16-sy – jekemenshik. Oblys ortalyǵyndaǵy Ertis, Ýsolka ózeninde sýǵa túsýge resmı túrde ruqsat berilgen. Pavlodar jaǵajaılaryndaǵy qaýipsizdikti qadaǵalaıtyn mamandar da, tehnıka da jetkilikti. Jekemenshik sý aıdyndarynda jeke qutqarýshylar qyzmet etedi.
Qazir aýyldyq jerlerde de sport keshenderi, fýtbol, hokkeı, basqa da oıyn alańdary bar. Biraq sý sporty aýylǵa áli jetken joq. Qaladaǵydaı júzý basseınderi salynyp, arnaıy mamandardyń kómegimen balalar kishkentaılarynan sýda balyqsha júzýge úırense deısiń.
Al bıyl ózen-kól, sý aıdyndarynda 513 reıdtik is-shara ótkizilip, saqtandyrý jaıly jadynamalar taratylǵan. Sýǵa túsetin ózen-kól jaǵalaýlaryna qaýipsizdik sharalary jazylǵan taqtaıshalar, jedel áreket jasaý úshin arnaıy beınebaqylaý quraldary ornatylǵan. О́tken jyly qutqarý qural-jabdyqtaryn alýǵa 20,9 mln teńge bólingen. Jazǵy maýsymdaǵy qaýipsizdikti saqtaý úshin qoǵamdyq qutqarýshylar da daıarlanýda.
Departament tarapynan jazǵy demalys lagerlerinde mektep jasyndaǵy balalardy júzýge úıretý maqsatynda 89 modýldik basseın ornatý boıynsha usynys berilgen. Ázirge 10 mektep jınalmaly basseın satyp alypty.
О́tken jyly oblys ortalyǵyndaǵy sýda júzýge arnalǵan alań Ertis ózeniniń Ýsolka jaǵalaýyndaǵy qutqarý beketinde ashyldy. Balalardyń sýǵa júzýdi úırený alańy qazirgi jazǵy maýsym bastalǵannan beri jumys isteýde. Qutqarýshylar balalarǵa sýda qalaı júzý, qandaı erejelerdi saqtaý kerek ekenin túsindiredi.
Qalalyq bilim berý bóliminiń málimetinshe, sońǵy jyldary balalardyń tentektigi men abaısyzdyǵynan, sýdaǵy qaýipsizdik erejelerin bilmeýinen, tótenshe jaǵdaılarda áreket ete almaýynan týyndaıtyn oqys oqıǵalar kóbeıe túsken. Sondyqtan tótenshe jaǵdaılardyń aldyn alý maqsatynda mektepterde jyl saıyn «Jas qutqarýshy» oblystyq jarysy ótkiziledi.
Qutqarýshylar sýǵa túsýge ruqsat etilgen oryndarda ǵana oqys jaǵdaılarǵa jol bermeıdi. Al adamdardyń ruqsat etilmegen jerlerde sýǵa túsýiniń sebebi – ózen-kólderde sýǵa túsetin oryndar az. О́tken jyly 584 adam belgilenbegen orynda sýǵa túskeni úshin, jaǵalaýlarda araq-sharap ishken 2 myńnan astam adam jaýapkershilikke tartylǵan.
Qutqarýshylar balalar sýda júze bilmeıtinin, sondyqtan olardy kishkentaı kezinen basseınge aparyp, júzýge úıretken durys ekenin aıtady. Bıylǵy jazǵy maýsymda Ekibastuz qalasynda balalardyń sýǵa ketýine olardyń ruqsat etilmegen orynda sýǵa túskenderi sebep boldy.
...Ertis ózeniniń jaǵalaýynda júrmiz. Baıqaǵanymyzdaı, ózenniń ortasyna deıin júzetin, bir shetinen ekinshi shetine deıin júzip jarysatyn demalýshylar az emes. Jaqsy júzemin degen bir jigittiń kenetten aıaǵy tartylyp, sýǵa túspeı jatyp, qaıta shyqty. Bala kezimizden ózenge sýǵa túsip úırengen biz sýdyń beti men ishindegi jylylyq birdeı emes ekenin bilemiz. «Sýdyń ortasyna, tereńge barmańdar, ol jerlerde ıirim kóp, ıirip áketedi», degen úlkender sózi de jadymyzda.
Oılap qarasaq, sonaý ótken ǵasyrdyń 70-jyldary biz, aýyl balalary bir-birimizden sýda júzýdi úırengenimizdiń ózi de bir ómirlik sabaq eken.
Pavlodar oblysy
