«Búgin Qazaqstanda alǵash ret aýyl ákimderiniń tikeleı saılaýy ótýde. Bul – Prezıdent aıtqandaı, elimizde saıası jańǵyrýdyń jańa kezeńin ashatyn óte mańyzdy sát. Memleket basshysy byltyrǵy Joldaýda ákimderdi tikeleı saılaý týraly bastama kótergen bolatyn. Nátıjesinde, ony usynǵannan bastap naqty iske asyrylǵanǵa deıin bir jyldan az ýaqyt ótti», dep jazdy ol Telegram-kanalynda.
Onyń aıtýynsha, aýyl ákimderin saılaý azamattarǵa óz eldi mekenderiniń damýyna tikeleı yqpal etýge jańa múmkindikter ashady.
«Olar memlekettik basqarý júıesiniń uzaq merzimdi jumys qaǵıdattaryn qalyptastyryp, memleket pen qoǵam arasyndaǵy ózara qarym-qatynastardyń sıpatyn sapaly etip ózgertedi. Sondyqtan, bul saılaý naýqanynyń barysy azamattar arasynda úlken qyzyǵýshylyq týdyrdy», deıdi Prezıdent keńesshisi.
Sondaı-aq, ol búgin ótip jatqan saılaý eldiń saıası órisin jandandyrǵanyn, jergilikti deńgeıde saıası básekelestiktiń artqanyn tilge tıek etti.
«Osy turǵydan alǵanda, barlyq 6 saıası partııanyń óz kandıdattaryn usynǵany, kóptegen ózin-ózi usynýshylar tirkelgeni de mańyzdy. Qasym-Jomart Toqaev bastamashy bolǵan úsh saıası paket sheńberindegi barlyq ózgerister dáıekti túrde is júzinde iske asyrylyp, qoǵamnyń suranystaryna saı keledi jáne eldiń odan ári demokratııalanýyna yqpal etedi», dep jazdy Erlan Qarın.
