Aıtpaqshy, óńirde aýyl ákimi bolýǵa yntalylar qatary kóp boldy. Áýelde saıası dodada baq synaýshylardyń sany 279 úmitker bolsa, saılaýǵa naqty 235 kandıdat qatysty. 44 úmitker túrli sebeptermen kandıdattar qatarynan alynyp qaldy. Saılaýǵa túsýshilerdiń 82-si saıası partııa ókilderi bolsa, 153 úmitker – ózin ózi usynǵandar.
– Buǵan deıin Ile aýdany Chapaev aýylynda ákimdikke 9 kandıdat tirkeldi dep aıtylǵan bolatyn. Búginde resmı derek atalǵan óńirde 5 úmitker qalǵanyn rastaýda. Ákimdikke úmitkerler eń kóp tirkelgen aımaq retinde Talǵar aýdany tanylyp otyr. Munda bir orynǵa 6 adamnan aınaldy, – deıdi Almaty oblysy saılaý komıssııasynyń múshesi Qaharman Jaqsylyq.
Al Qaratal aýdanynda 6 kandıdat saılaýǵa túsýde. Saılaý nátıjesinde Bastóbe jáne Jolbarys batyr aýyldyq okrýgterine ákim saılanady. Ár okrýgte 3 kandıdat bar, onyń beseýi er adam bolsa, bireýi – áıel. Olardyń 4-eýi ózin-ózi usynǵan, 2-eýi – Nur Otan partııasynyń ókilderi.
Shaǵyn ǵana Bastóbe aýyldyq okrýgine qarasty Jylybulaq aýylyndaǵy №5551 saılaý ýchaskesinde 418 saılaýshy tirkelgen. Turǵyndardyń jartysynan astamy túske deıin daýys berip, óz tańdaýyn jasapty.
– Búgingi saılaý naýqanynda turǵyndardyń belsendiligin atap ótken jón. Barlyǵy azamattyq-quqyqtyq jaýapkershiligin negizge ala otyryp, óz úmitkerine daýys berýde. Biz turǵan ýchaskedegi saılaý ádil, ashyq, aıqyn negizde ótýde. Saılaý barysynda eshqandaı zańǵa qaıshy áreketter anyqtalǵan joq, – deıdi Nur Otan partııasynyń atynan kelgen baıqaýshy Raýza Dosmaǵulova.
Almaty oblysynyń Sarqan aýdanyna qarasty Ekiasha aýylynda turatyn Nurshat pen Hanshaıym ájelerdiń qımyly shıraq, aınaladaǵy oqıǵaǵa qulaǵy túrik eken. Aýylda saılaý ótedi degeli qarııalar óz tańdaýyn jasaýdy uıǵarypty. Ertemen ashylǵan daýys berý ýchaskesine kelgen qos qarııa erteń el tizginin ustaıtyn aýyldasyn tańdaǵan kórinedi.
– Búgingi saılaý bizder úshin mańyzdy. Aýylymyzdyń ákimin bir aýyzdan saılap, aýyldyń kemel keleshegin jańa basshyǵa senip tapsyrmaqpyz. Sondyqtan da saılaýdan tysqary qalmaı óz daýysymdy berýge keldim. Ár turǵyn ótkizilip jatqan saılaýdyń mańyzdylyǵyn túsinip, tańdaýdy durys jasaıdy degen senimdemin, – deıdi qart ana Hanshaıym.
Almaty oblysy
