2000 azamat ózderi saılaýǵa qatysýǵa usynys bildirdi. Munyń qandaı nátıje ekenin túsinesiz ǵoı. Máselen, Qaraǵandy oblysynda 75 ákim saılaý kerek boldy. Olar 257 kandıdattyń ishinen saılandy. Nur Otan partııasynan 56 ákim, «Aýyl» partııasynan 3 ákim, «Aq jol» partııasy men Adal partııasynan 1 ákimnen saılandy. Bul oblysta ózin ózi usynǵan 178 azamattyń 14-i saılandy.
Taǵy bir eskeretin jaıt, «Barlyǵyna qarsymyn» degen daýys az boldy. Quqyq buzý men tártip buzý da az tirkeldi. Bul da qýantatyn jaıt.
Nur Otan partııasynan kandıdat sany kóp boldy. Nátıjeleri de basym bolady dep oılaımyn. Shamamen 75 paıyzǵa ıe bolýy múmkin. Al 25 paıyz basqa partııa ókilderi men ózin ózi usynǵandarǵa tıesili.
Buryn bolǵan jaǵdaımen salystyrsaq, bul saılaý áldeqaıda jaqsy nátıje kórsetip otyr. Bir másele – Ortalyq saılaý komıssııasynyń aqparatty jınamaýynda. Bul ortaq aqparat bolmaýyna alyp keledi. Saıasattanýshylar da, jýrnalıster de ózderine qajet aqparatty ala almaıdy. Ár oblys jeke aqparat jınap, jeke statıstıka jasaıdy. Odan keıin munyń barlyǵyn jınaý kerek. Bylaı qarasańyz, barlyq oblystyń aqparatyn jınap otyrý da ońaı sharýa emes. Aldaǵy ýaqytta bul olqylyqtyń orny tolady degen úmittemiz.
Marat ShIBUTOV,
saıasattanýshy
