Bıyl basqarma tarapynan 113 qurylys jobasy iske asyrylýda. Mekeme qyzmetiniń tıimdiligin baǵalaý 8 maqsatty kórsetkishter boıynsha júrgiziledi.
Jyl sońyna deıin paıdalanýǵa beriletin turǵyn úılerdiń jalpy aýmaǵyn 1 mln. sharshy metrge jetkizý josparlanýda. Jańadan salynyp jatqan baspanalardyń ishinde 570 myń sharshy metri – kóp qabatty turǵyn úıler bolsa, 430 myń sharshy metri – jeke turǵyn úılerdiń úlesinde.
Byltyr Shymkent qalasynda jeke jáne kópqabatty turǵyn úıler sanatynan 649,1 myń sharshy metr turǵyn úı salynǵan bolatyn. Birinshi jartyjyldyqta 276,3 myń sharshy metr turǵyn úı paıdalanýǵa berildi. Byltyrǵy jyldyń tıisti kezeńimen salystyrǵanda bul kórsetkish 101,9 paıyzǵa artqanyn baıqaýǵa bolady.
Aıta ketsek, birinshi jartyjyldyqta negizinen jer qazý jumystary júrgiziledi. Qurylys qarqyny jyldyń ekinshi jartysynan bastap artady.
Basqarmanyń alty aıda atqarǵan jumystary jóninde esep bergen basqarma basshysynyń mindetin atqarýshy B.Kúzdeýbaevtyń aıtýynsha, qurylys jumystary kóleminiń jyldyq jospary 135,6 mıllıard teńge bolyp belgilengen. Birinshi jartyjyldyqta atqarylǵan qurylys kólemi 50,1 mıllıard teńgege jetip, byltyrǵy jyldyń sáıkes kezeńimen salystyrǵanda naqty kólem ındeksi 115,6 paıyzdy quraǵan.
Jyl basynan «Nurly jer» baǵdarlamasy boıynsha 4832 páterli 79 kópqabatty turǵyn úılerdiń qurylystary bastalǵan. Onyń ishinde 1224 páterli 18 turǵyn úı – arendalyq baspanalar bolsa, 3608 páterli 61 úıdiń kiltteri – turǵyn úı nesıesin alǵandarǵa tabystalmaq.
Jańadan salynǵan nysandarǵa ınjenerlik ınfraqurylym tartý boıynsha 15 jobany iske asyrý kózdelip, onyń 6 nysany paıdalanýǵa berilgen.
Bilim salasy boıynsha 11 nysannyń qurylysyna qarjy qarastyrylǵan. Onyń ishinde 4 mekteptiń ǵımaraty jańa oqy jylyna deıin iske qosylady dep kútilýde. Mádenıet jáne sport salalarynda 5 nysannyń qurylystary josparlanyp, onyń eki nysany paıdalanýǵa berildi.
Joba-smetalyq qujattamalar ázirleý boıynsha eki medısınalyq uıym men Saıram turǵyn alabynda órt sóndirý deposynyń qurylystaryn júrgizý josparlanyp, iske asyryýda.
Esep barysynda basqarmanyń atqarǵan jumystaryn taldaǵan Murat Dúısenbekuly qurylys qalanyń damýyna yqpal etetin mańyzdy sala ekendigine toqtaldy. Qurylys júrgizý qala ekonomıkasynyń damýyna tutastaı áser etip, bıznestiń qurylys naryǵyna beıimdelýi júzege asatynyn, onyń ishinde qurylys materıaldarynyń óndirisi qarqyn alatynyn atap ótti.
«Qalanyń tirshiligi jyljymaıtyn múlik naryǵy arqyly órbıtini belgili. Sondyqtan-da, qurylys jumystaryn josparlaý kezeńinde naqtylyqqa basa nazar aýdarý qajet. Bul baǵytta basqarmanyń josparlaý qyzmeti qurylymynyń jumysyn júıeleý kerek», dedi qala ákimi.
Murat Áıtenov atqarylyp jatqan jumystardy qadaǵalaýdy utymdy uıymdastyrý kerektigine nazar aýdaryp, salynyp jatqan nysandarǵa onlaın rejımde translıasııa jasaýǵa múmkindigi bar kameralar ornatýdy usyndy. Osylaısha, qurylys basqarmasy atqarylyp jatqan jumystardyń sapasyn kúndelikti baqylap, óndiristik kesteniń saqtalýyna kepil bolmaq. Qurylys nysandarymen tikeleı efırde baılanysa otyryp, jumys jıyndaryn da ótkizýge bolatynyn atap ótti.
Kezdesýdi qorytyndylaı kele, qala ákimi paıdalanýǵa berilgen nysandardy teńgerimge ótkizý jónindegi jumystardy erekshe baqylaýda ustaýdy tapsyryp, lıft sharýashylyqtary tıisti talaptarmen tekserýden ótip, ruqsat qaǵazdary alynbaıynsha, kópqabatty turǵyn úıler memlekettik qabyldaýdan ótkizilmeýi kerek dep naqty aıtty.
