Elordalyq Áleýmettik-medısınalyq saqtandyrý qorynyń málimetine súıensek, bıyl I jartyjyldyqta 2,02 mlrd teńge somasyna (onyń ishinde kúndizgi stasıonarlarda – 43 308, táýliktik stasıonarlarda – 36 999) ońaltý qyzmeti kórsetildi. Sol sııaqty ambýlatorııalyq-emhanalyq deńgeıde 274,6 mln teńge somaǵa 270 316 qyzmet kórsetildi.
«Koronovırýs ınfeksııasymen kúres aıasynda ambýlatorııalyq deńgeıde eresekter men balalarǵa medısınalyq kómek kórsetilip jatyr. Bizdiń aqparattyq júıedegi derekterge saı, 2021 jyldyń 6 aıynda 104,07 mln teńge somasyna 26 226 resept boıynsha 19 472 pasıent antıbakterıaldyq, ystyq túsiretin preparattarmen jáne antıkoagýlıanttarmen qamtamasyz etildi. Onyń ishinde COVID-19 ınfeksııasy boıynsha 88,48 mln teńge somasyna 14 117 reseptimen 9 851 pasıent dárimen qamtyldy. Sondaı-aq, COVID-19-dyń jeńil túrimen aýyrǵan naýqastar PTR-test nátıjesine qaramastan, emdeýshi dárigeriniń taǵaıyndaýy boıynsha ystyq túsiretin dáriler men antıkoagýlıanttardy ózi tirkelgen emhanadan ala alady», dedi Nurlybek Qabdyqaparov ZOOM platformasynda ótken baspasóz máslıhatynda.
Fılıal basshysy vırýstyq indetten jazylǵan soń pasıentke qandaı ońaltý kómeginiń kórsetiletini týraly aıtyp berdi.
«Elorda turǵyndary koronavırýs jáne pnevmonııa kezinde medısınalyq kómekti medısınalyq saqtandyrý júıesindegi mártebesine qaramastan tegin alady. Bizdiń qor Nur-Sultan qalasy boıynsha ońaltý qyzmetterin kórsetetin 45 medısına uıymymen kelisimshart jasaǵan. Onyń ishinde 20 jekemenshik, 22 memlekettik jáne 3 respýblıkalyq medısına uıymy bar. Sonymen qatar, koronavırýspen nemese ortasha, aýyr jáne asa aýyr deńgeıdegi pnevmonııamen aýyrǵan pasıentter Medısınalyq saqtandyrý qorynyń qarajaty esebinen ońaltýdan óte alady. Azamattar úıinde emdeldi me, álde aýrýhanada emdeldi me, oǵan qaramaıdy. Medısınalyq ońaltýǵa joldama reabılıtolog mamannyń keńesimen aýrýhananyń nemese emhananyń mýltıdıssıplınarlyq komandasynyń qorytyndysy boıynsha beriledi», dep túsindirdi Nurlybek Qabdyqaparov.
