О́ńirde «Igi ister» marafony jalpyulttyq jobasy aıasynda myńnan astam ımanjúzdi is-shara júzege asyryldy. Qaıyrymdy jandardyń kómegimen 9500 jalǵyzilikti adamǵa kóp-kórim áleýmettik járdem jasaldy. 2600 kópbalaly jáne áleýmettik jaǵynan az qamtylǵan otbasyǵa azyq-túlik sebetteri taratyldy.
Janyńdy eljireter janashyrlyqtan jastar da shet qalǵan joq. Oblystyq jastar resýrstyq ortalyǵy eriktilermen birlese otyryp, osy joba aıasynda «30 ıgi is» aksııasyn bastap ketti. Sharapaty mol is-shara týraly qulaqtanǵan el qamyn jegen eriktiler men joǵary oqý ornynyń stýdentteri, etnomádenı birlestikter ókilderi bar kúsh-jigerlerin halyqtyń jaǵdaıyn jaqsartýǵa jumyldyrýda.
Osy oraıda ótken qystaǵy tyńǵylyqty bir sharýany aıta ketýge bolady. Soltústik óńirdiń qary mol. Qysta eriktiler 1320 aýlany tazartyp, 40 tonnaǵa jýyq qar shyǵardy. Bul jaı ǵana derek bolyp kóringenimen, jastar osy isi arqyly qanshama egde adamnyń batasyn alyp, kóńilderin demdegenderin ańǵarýǵa bolady.
«Dobroe serdse Lider.kz» qoǵamdyq qory órtten zardap shekken otbasylarǵa kómektesý úshin qor ashyp, 500 myń teńge kóleminde qarajat jınap, óz nıetterin bildirdi. Býrabaı aýdanynyń eriktileri órtten zardap shekken otbasylarǵa qarjylaı kómek kórsetti. Mektep oqýshylarynyń oqý quraldaryn alyp berip, qap-qap azyq-túlik jiberdi.
Osy oraıda sátimen sabaqtalǵan urpaqtar arasyndaǵy janashyrlyq jaıly aıta ketýge bolar edi. Jastar resýrstyq ortalyǵy ómirsheń ónegesi mol «Ákeler odaǵy» qoǵamdyq birlestigimen bilek biriktire otyryp, ondaǵan otbasynyń sharýasyna qol ushyn berip, 10 jalǵyzbasty ákege azyq-túlik sebetterin jetkizip berdi.
–Jyl basynan beri Qazaqstan halqy Aqmola oblystyq assambleıasynyń qoǵamdyq qurylymdary «Igi ister» jobasy aıasynda 5 myńnan astam adamdy qamtyp, jalpy somasy 60 mıllıon teńge qarjy bolatyn 180 qaıyrymdylyq is-sharasyn ótkizdi. Bul bir jaǵynan kómek qajet etetin otbasylarǵa demeý bolsa, ekinshi jaǵynan jas tolqyn úshin jaqsy ónege, – deıdi oblystyq jastar resýrstyq ortalyǵynyń jetekshisi Mánsııa Esekeeva.
El qamyn jegen adamdardyń nazarynan jergilikti jerdegi ekologııa máselesi de tys qalǵan joq. Jigeri mol jastar aýyl-aımaqty kógaldandyryp, júzdegen aǵash kóshetterin ekti.
Osyndaı elgezek jastardyń eńbegi dáýirdiń dıdaryn ádemi shyraımen aıshyqtap, halyqty toptastyra túsetini haq.
Aqmola oblysy
