«Ata-analarǵa erteń qujat qabyldaýdyń sońǵy kúni ekendigine nazar aýdarýdy suraımyz. Bul merzim bolashaq oqýshylardyń ata-analary mektepti aldyn ala anyqtap, qajet qujattardy ýaqytyly tapsyryp, balalardy oqý quraldarymen qamtamasyz etýi úshin berildi» dep eskertedi Bilim jáne ǵylym mınıstrligi.
Al mektep ákimshiligi synyptardy aldyn ala jınaqtaý, oqýlyqtardyń qajetti kólemin satyp alý, muǵalimder arasynda saǵattardy bólý jáne synyptar sanyna baılanysty pedagogter quramyn anyqtaý jumystaryn atqarady. Osyǵan baılanysty mınıstrlik ótinishterdi ýaqytyly berýdiń mańyzyn eske salady.
«Qujat qabyldaý 4 aıǵa sozyldy. Bul ata-analarǵa da, mektep ákimshilikterine de oqý prosesine daıyndyqty aldyn ala oılastyrýǵa múmkindik berdi. Sondaı-aq, 10 tamyzdan keıin mektepterde daıyndyq toby jumysyn bastaıdy, oǵan ata-analardyń qalaýy boıynsha mektepke deıingi mekemelerge barmaǵan nemese mektepaldy daıarlyqtan ótpegen balalar bara alady», dep atap ótti QR BǴM Mektepke deıingi jáne orta bilim komıteti tóraǵasynyń orynbasary Jomart Qarambaev.
Eske sala ketsek, ótinish qabyldaý Egov.kz elektrondyq úkimet portaly arqyly elektrondyq formatta júrgiziledi.
Mektepke qabyldaný úshin kelesi qujattardy usyný qajet: balanyń densaýlyq jaǵdaıy týraly qujattar (balanyń densaýlyq pasporty №026/ý-3, №063/ý nysany boıynsha medısınalyq anyqtama); balanyń 3h4 sm kólemindegi sıfrlyq fotosýreti.
О́tinish 1 jumys kúni ishinde qaralady.
«Qyzyl» aımaqqa engen óńirlerde turatyn ata-analar medısınalyq anyqtamany oqý jylynyń bastalýyna deıin ala alady.
