Japonnyń tól sporty sanalatyn karate qazaqqa da jat emes. Ony sportshylarymyzdyń sońǵy jyldary halyqaralyq jarystarda kórsetip júrgen nátıjelerinen-aq baıqaýǵa bolady. Darhan Asádilov, Danııar Iýldashev, Qaısar Alpysbaı, Dıdar Ámiráli, Sofıa Berýlseva, Sabına Zaharova syndy qyz-jigitterimiz álem nemese Azııa deńgeıindegi talaı baıraqty básekelerde top jaryp, Alash jurtynyń abyroıyn asqaqtatyp júr. Endigi kezekte – Olımpııa oıyndary. Tokıo tórinde ótetin karate jarystarynda el namysyn qorǵaıtyn sportshylarymyz óz múmkindikterin múlt jibermeýi tıis.
Tokıo Olımpıadasyna elimizden bes karateshi joldama alǵany barshamyzǵa belgili. Olardyń arasynda Darhan Asádilovke artylar senim zor. Darhan – álem chempıonatynyń eki dúrkin júldegeri, Azııa oıyndarynyń chempıony jáne Premer-lıga jarysynyń birneshe dúrkin jeńimpazy. Olımpııa oıyndaryna álemdik reıtıng arqyly joldama alǵan otandasymyz sońǵy eki jylda úzdik kórsetkishterge qol jetkizdi. Máselen, 2019 jyly ol alty (!) birdeı jarysta top jarsa, eki jarysta qola júldeger atandy. Byltyr pandemııaǵa baılanysty úsh jarysqa ǵana qatysyp, sonyń úsheýinde de júlde aldy. Al bıyl tek Lıssabondaǵy Premer-lıgaǵa qatysyp, úzdik úshtikti túıindedi.
Darhannyń Olımpııa oıyndaryndaǵy qarsylastary da osal emes. Onyń ústine otandasymyz Tokıo tórinde óziniń úırenshikti salmaǵynda (60 kılo) emes, 67 kıloda óner kórsetedi. Iаǵnı Olımpıada baǵdarlamasyndaǵy salmaq – 67 kılo.
Olımpııa oıyndaryna ár salmaqta on adamnan qatysady. Tek 67 kıloda uıymdastyrýshylar 11 sportshy qosyp otyr. Iаǵnı irikteý kezeńinen ótken 10 myqtydan bólek, Hamýn Derafshıpýr atty ırandyq sportshy bosqyndar komandasynyń atynan shyǵady. Hamýn qazirgi tańda Kanadada turyp jatyr. 2018 jyly Madrıdte ótken álem chempıonatynda Iran eline qola medal syılaǵan ol bir jyl ótkennen keıin federasııa basshylarymen kelispeı, aqyry Kanadaǵa qonys aýdardy.
Darhannyń basty qarsylasy retinde, árıne álem chempıony fransýz Stıven Da Kostany aıtýǵa bolady. Ol 2015 jyldan beri ótip kele jatqan iri jarystardyń barlyǵynda júlde alyp júr. Negizgi salmaǵy da – 67 kılo. Iаǵnı Darhanǵa qaraǵanda bul salmaqta ábden boı úıretken sportshy.
Asádilovtiń taǵy bir basty qarsylasy – japonııalyq Naoto Sago. Karateni tól sportymyz dep tanıtyn Kúnshyǵys eliniń ókilderi Sagoǵa zor senim artyp otyr. Onyń ústine karate Olımpıada baǵdarlamasyna tuńǵysh ret qosyldy. Tarıhtaǵy alǵash chempıon da osy 67 kıloda anyqtalady.
2018 jylǵy álem chempıonatynyń jeńimpazy ıtalııalyq Andjelo Kreshenso da – bas júldeden úmitker sportshylardyń biri. Italııa sportshysymen Darhannyń talaı jarysta joly túıiskenin bilemiz. Sońǵy ret ekeýi byltyr Dýbaıda ótken Premer-lıganyń fınalynda jolyǵyp, Kreshenso 2:0 esebimen jeńiske jetti. Sondaı-aq myqtylardyń qataryna túrik Eraı Samdandy, latysh Kalvıs Kalnınshty da qosýǵa bolady. Qalaı bolǵanda da Darhanǵa úlken senim artylyp otyr. Alash alqalaǵan Asádilovtiń asyǵy alshysynan túse me, joq pa ony aldaǵy saıystarda kóretin bolamyz.
