Táýelsizdiktiń 30 jyldyǵy • 03 Tamyz, 2021

Ký Hong-sok: «Eń mańyzdy jetistigimiz – mádenı jáne dostyq qarym-qatynas»

191 ret kórsetildi

Elimizdiń Táýelsizdigi jyldarynda Koreıa Respýblı­kasymen (Ońtústik Koreıa)  jan-jaqty qarym-qatynas ornatylyp, ózara tıimdi ynty­maqtastyq jemisti jalǵasyn tabý ústinde. Osyǵan oraı, Koreıa Respýblıkasynyń Qazaqstandaǵy Tótenshe jáne ókiletti elshisi Ký Hong-sok myrzaǵa birneshe saýal qoıǵan edik.

– Qurmetti elshi myrza, Qazaq­standaǵy dıplomatııalyq qy­zmetińizge kiriskenińizge bir jyl tolyp otyr. Bizdiń elge kelýi­ńiz jahandyq pandemııa­men tuspa-tus kelgeni belgili. Osy kúrdeli kezeńde Qazaq­stan­men tanystyǵyńyz qalaı bastaldy?

– Durys aıtasyz, Nur-Sultan­ǵa kelgenime bir jyl boldy. Men negizi ótken jyly 8 mamyr­da Qazaq­stanǵa elshi retinde taǵa­ıyn­dalǵannan keıin birden ushyp kelýim kerek edi. Alaıda týra sol ýaqytta pandemııaǵa baı­la­nys­ty Qazaqstan men Koreıa Res­pýb­lıkasy arasyndaǵy áýe reısteri toqtap, qyzmetime kirise almadym. Jaǵdaı turaqtalyp, barlyǵy qalpyna kelgende ashylǵan al­ǵash­qy reıspen Qazaqstanǵa ushyp kel­dim. Qazir eske alsam, sol sát­te ózimdi Qazaqstanǵa qaıta jol salǵan adam sekildi sezingen eken­min. Munda kelip, qyzmetime to­lyq kiriskenimmen, pandemııaǵa baı­lanysty shekteýler kóp edi. Degenmen bizdiń elshilik indet­pen kúreste qol qýsyryp otyra almady. Eki el arasyndaǵy den­saýlyq saqtaý salasyndaǵy ynty­maq­tasty damytýǵa belsene atsalys­ty. Sol kúrdeli kezde Almaty qalasynda ornalasqan koreı klınıkasy indetti anyqtaýda dıag­nostıkalyq qyzmet kórsetip, vırýs­pen kúreske óz úlesin qosty. Keıinirek Qazaqstan Prezıdenti Qasym-Jomart Toqaev Almatyǵa jumys saparymen barǵanda sol mekemeniń qyzmetimen de tanys­ty. Sondaı-aq Koreıa úkimetiniń in­det­pen kúrestegi tájirıbesin tanys­tyrý úshin qazaqstandyq árip­tes­termen túrli kezdesýler, se­mı­narlar men basqa da is-sha­ra­lar uıymdastyrdyq. Son­daı-aq Koreıa Respýblıkasy Qazaq­stanǵa 800 myń dollar kóle­minde gýmanıtarlyq kómek kór­setti. Bul kómektiń bir bóligi Koreıa elshiliginiń, DDU-nyń Qa­zaq­standaǵy ókildiginiń jáne Qazaq­stannyń Densaýlyq saqtaý mınıstr­liginiń qatysýymen úsh­jaqty formatta usynyldy. Odan bólek, qarttar úılerine, ba­la­lar úılerine, mektepterge, ha­lyq­tyń osal toptaryna arnap, qa­ıy­­rym­dylyq is-sharalaryn ót­kiz­dik. Bul is-sharalarǵa ózim de qa­tys­tym. Men úshin osy sátter qyzmeti­m­men baı­lanysty ystyq ári qym­­bat es­telikter bolyp qaldy. Ko­reı hal­­qynda «Qıyn sátte qol soz­­ǵan do­syń – jaqyn týysyńnan qym­­bat» degen maqal bar. Men de qazaq­­stan­­dyqtarǵa shyn kóńilmen kómek­tes­­kim keldi. Byltyr osy sekil­di bir­qatar is-sharany júzege asyrdyq.

– Qazaqstan men Koreıa Res­pýb­lıkasynyń dıplo­matııa­lyq baılanysy joǵary deń­geıde ekeni belgili. Qos el­diń saıası, saýda-ekonomı­ka­lyq, ınvestısııa­lyq, ınnova­sııalyq, mádenı, sporttyq jáne týrıstik salalardaǵy ózara tıimdi yntymaqtastyǵy jyl­dan-jylǵa nyǵaıyp keledi. Munyń sebebi nede dep oılaısyz? Postpandemııa kezeńindegi qarym-qatynasymyz qalaı damymaq?

– Qazaqstan táýelsizdikke qol jet­kizgennen keıin, 1992 jy­ly el­derimizdiń arasynda dıp­­lo­matııa­lyq qarym-qatynas orna­tyldy. Kelesi jyly ynty­maq­­tastyǵymyzǵa 30 jyl tolady. Koreıada bul kezeń adam­nyń jastyqtan shyǵyp, kemeldený shaǵy dep atalady. 2009 jyly eki el ózara qarym-qaty­nas deńgeıin strategııalyq árip­tes­tikke deıin kóterdi. Qazaq­stan biz úshin – Ortalyq Azııa óńi­rin­degi negizgi saýda jáne ın­ves­tı­sııalyq áriptesimiz, son­d­aı-aq «Jańa Soltústik saıasat» baǵdarlamasynyń negizgi seriktesi. Meniń oıymsha, ekijaq­ty baılanystyń úzdiksiz damýy eki el basshylarynyń ara­syn­daǵy senimdi qarym-qaty­nas­pen tikeleı baılanysty. 2019 jyly Koreıa Prezıdenti Mýn Chje In Qazaqstanǵa kelgen sapa­rynda Prezıdent Qasym-Jo­mart Toqaevpen jáne Tuń­ǵysh Pre­zıdent – Elbasy Nursul­tan Nazar­baevpen kezdesýler ótkizdi. Sapar barysynda «Samal jel» atty ekonomıkalyq yntymaqtastyq jáne ózara is-qımyl deńgeıin art­tyrý baǵdarlamasyna qol qo­ıyldy. Odan bólek, Úkimet, Par­lament deńgeıinde de osyndaı tyǵyz yntymaqtastyq ornaǵan. Dese de eń mańyzdy jetistigimiz – azamattar arasyndaǵy mádenı jáne dostyq qarym-qatynas. Halyqtarymyzdyń dál osy izgi qasıetteri úkimetter arasyndaǵy yntymaqtastyqty nyǵaıta túsedi.

Qazaqstan kóshelerinen Hyundai, Kia sekildi koreı óndirý­shi­leriniń avtokólikterin jıi kózim shalady. Ár úıde koreıdiń Samsung, LG kompanııalarynyń turmystyq tehnıkasy, smartfony bar. Sondaı-aq teledıdardan koreı telehıkaıalaryn jıi kórsetetinin baıqaımyn. Sol arqyly qazaq halqy Koreıa týraly kóp biledi-aý degen tujyrymǵa keldim. Al jylyna 50 myńnan astam qazaqstandyq Koreıaǵa saıa­hattaıdy eken. Sondaı-aq qazaq mádenıeti Koreıada da tanymal bola bastady.

Eki eldiń pandemııadan ke­ıin­gi yntymaqtastyǵyna keler bol­saq, basty tórt baǵytty atap ót­kim keledi. Pandemııa kór­set­ken­deı, eń aldymen, densaý­lyq saq­taý salasyndaǵy yntymaq­tas­tyq­ty kúsheıtý qajet dep sa­naı­myn. Qazir álemde qashyq­tan jumys isteý, bilim alý keńi­nen taralyp jatyr. Sol sebepti, ekinshiden, aqparattyq ınnova­sııa­lyq tehnologııany damytý mańyzdy. Úshinshiden, munaı jáne gaz salasyndaǵy ynty­maq­­tas­tyq. Qazir klımattyń ózge­rýi, jańartylatyn energııa kóz­­deri ózekti bolyp otyr. Tórtin­shiden, bizge jasyl energetıka salasyn­daǵy yntymaqtastyq mańyzdy.

Qasym-Jomart Toqaev óz sózin­de taza energetıkany jáne jal­py jasyl tehnologııany jaq­taıtynyn, jańartylatyn qýat kózderin paıdalanatyn elektr stansalaryn salýdy qol­daı­tynyn aıtyp, búkil damyǵan álem atom energııasyna ıek artady degen edi. Men bul pikirmen tolyq kelisemin. Alaıda atom ener­gııasyn paıdalaný kezinde qaýip­sizdik asa mańyzdy. Mundaı stansalardy salarda qaýipsiz­dik pen basqarý tájirıbesi mańyz­dy. Koreıanyń bul salada tájirı­be­si jetkilikti bolǵandyqtan, atom ener­­­getıkasyndaǵy yntymaqtas­ty­qty qarastyrýǵa bolady der edim. Eger Qazaqstan atom stan­sa­­syn salýdy josparlasa, Koreıa úkimeti buǵan qyzyǵýshylyq tanytary sózsiz.

Jalpy, Qazaqstanda 300-den astam shaǵyn jáne iri koreı kompanııasy jumys isteıdi. Buryn turmystyq tehnıka men kólikter Koreıadan tasymaldansa, qazir Qazaqstanda óndiris oryndary ashylǵan. Máselen, byltyr Hyundai zaýyty ashyldy. Sondaı-aq «Rahat» kompanııa­syn satyp alǵan koreıalyq Lotte korporasııasy Qazaqstanda kondıter­lik ónim shyǵarady. Odan bólek, qurylys, bank salasynda da Koreıa kompanııalary belsendi. Qazaq­stan, eń aldymen, resýrsymen, aqyldy, básekege qabiletti jas mamandarymen, Koreıaǵa degen jaqsy qarym-qatynasymen jáne tıimdi sharttarymen bizdi qyzyqtyrady.

– Ortalyq Azııada ótken ǵasyrda saıası qýǵyn-súr­ginge ushyraǵan etnostyq koreıler­diń úshinshi urpaǵy ósip-ónip keledi. Kezinde tarıhı oqıǵa­lar­dyń saldarynan jyraq­qa qonys aýdarýǵa májbúr bol­­ǵan koreıler eki el arasyn­daǵy baılanysta qandaı ról atqarady?

– 1937 jyly kóptegen koreı Reseıdiń Qıyr Shyǵysynan Or­ta­lyq Azııa elderiniń aýmaǵy­na kúshtep kóshirilgeni belgili. Sol kezeńniń qıyndyǵy týraly de­rek­ti fılmder men baǵdarla­ma­lardan kórip bildim. El basyna kún týǵanda qazaq halqy ko­reı­lerdi qushaq jaıa qarsy alyp, baspana men as berip, qolushyn sozdy. Osynyń arqasynda Qazaq­stanǵa jer aýdarǵan koreıler aman qaldy. Qazir elde koreı dıas­po­rasynyń 100 myńnan astam ókili turady. Jergilikti ko­reı­ler­men kezdesýde olar árda­ıym qazaq jeri men halqynyń rııa­syz kóńiline alǵysyn bildi­rip jatady. Koreıa Respýblıkasy­nyń elshisi retinde men de koreı hal­qy­nyń atynan Qazaq eline shyn júrek­ten rızashylyǵymdy bildirgim keledi.

Koreı dıasporasynyń ókil­deri búginde Qazaqstan qoǵa­myn­da óz ornyn tapty deýge bolady. Par­lament Májilisi depýtat­tary­nyń 7-shi shaqyrylymyna tarıhta alǵash ret koreı dıasporasynan 2 depýtat saılandy. Koreı dıas­porasyn Koreıa men Qazaqstandy baılanystyratyn kópir deýge bolady.

Sondaı-aq 1937 jyly Qazaq­stanǵa kúshtep qonys aýdarylǵan koreılerdiń arasynda Koreıa Respýblıkasynyń Halyq Batyry, táýelsizdik úshin kúresken general Hon Bom Do bolǵanyn aıtqym keledi. Ol Qyzylorda qalasynda jer­lengen. Aldaǵy ýaqytta Pre­zı­dent Qasym-Jomart Toqaevtyń Koreıa Respýblıkasyna resmı sapary júzege asatyn kezde batyr­dyń súıegin tarıhı Otanyna qaı­tarýdy josparlap otyrmyz. Bul arqyly eki el turǵyndaryna sol bir tarıhı oqıǵa men ózara dos­ty­ǵymyzdy taǵy bir eske salamyz. Bıyl eki eldiń Úkimetteri Pre­­zı­dent Q.Toqaevtyń Koreıaǵa saparyn uıymdastyrýdy pysyq­tap jatqanyn aıta ketken jón. Bul bizdiń ózara qarym-qatyna­sy­myzdy taǵy bir deńgeıge kótere­tin jáne Qazaqstan Táýelsiz­digi­niń 30 jyldyǵyn merekeleý qar­sa­ńyndaǵy mańyzdy sapar bolady dep esepteımiz.

– Ońtústik Koreıanyń syrt­qy saıasatyndaǵy Ortalyq Azııanyń róline toqtalsaq. О́zara baılanysta basymdyq qaı salaǵa berilip otyr?

– Ortalyq Azııa men Koreıa yn­ty­maqtastyǵynyń myń jyldan astam tereń tarıhy bar. Ási­re­se, bizdi eki el arqyly ótken Jibek joly baılanystyrdy. Keıi­nirek, qazirgi tarıhta 1937 jyly koreılerdiń Ortalyq Azııa­ǵa jer aýdarýy halyqtar ara­syn­daǵy baılanysty nyǵaıta tústi. Al 1990 jyldardyń basyn­da Keńes Odaǵy ydyraǵannan ke­ıin aımaqtaǵy elder arasyn­da Qazaq­stan alǵashqy bolyp na­ryqtyq ekonomıkaǵa bet burdy. Dál osy sebepti Qazaqstan Koreıa­nyń negizgi ınvestısııalyq jáne saýda seriktesine aınaldy. Ortalyq Azııa elderimen áriptestikti damytarda árdaıym Qazaqstannyń aımaqtaǵy kóshbasshylyq rólin nazarǵa alamyz. Jyl saıyn Syrt­qy ister mınıstrleri deń­ge­ıin­de ótetin «Ortalyq Azııa – Koreıa yntymaqtastyq forýmy» ar­qy­ly aımaqpen baılanys­ty úzbeımiz. Memleketter arasyn­da úılestirýshi qyzmet atqa­ra­tyn forým hatshylyǵy da bar. Qazaqstan aldaǵy ýaqytta da aı­maqtaǵy kóshbasshy el retin­de Koreıa men Ortalyq Azııa ynty­maq­tastyǵynyń nyǵaıýyna yqpal etedi dep úmittenemiz.

– Syrtqy saıasat týraly aıt­qan­da Ońtústik Koreıanyń Sol­tústik Koreıamen qarym-qa­ty­na­syn aınalyp ótý qıyn. Osy rette eki eldiń qazirgi baı­lany­syna qandaı baǵa berer edińiz?

– Koreıa úkimeti mańyzdy eki maq­satty kózdeıdi. Olar – Sol­tús­tik Koreıany tolyǵymen ıadro­lyq qarýdan azat etý jáne túbek­te turaqty beıbitshilik ornatý. Buǵan qol jetkizý úshin kez kelgen aran­datýshylyq nemese janjal týdyratyn áreketterdi boldyrmaı, qaýipsizdik týraly ózara kepildik bolýy shart jáne ál-aýqatty art­tyrýǵa birdeı umtylýymyz kerek. Soltústik Koreıamen dıalog júr­gizip, qaqtyǵystardyń aldyn alý mańyzdy. Sońǵy jyldary Sol­tústik jáne Ońtústik Koreıa mem­le­ketteriniń basshylary bir­neshe kezdesý ótkizdi. AQSh pen Soltústik Koreıanyń basshylary 3 ret kezdesti. Jaqynda Ońtús­tik Koreıa memleketiniń basshysy AQSh-qa saparmen baryp, jańa­dan saılanǵan Prezıdent Baı­denmen kezdesti. Qos el de Sol­tús­tik Koreıany ıadrolyq qarýdan to­lyǵymen azat etýge jáne aı­maqta beıbitshilik ornatýǵa umty­latynyn rastady. Bul maqsatqa jetýdiń basty quraly – dıalog pen dıplomatııa ekeni aıtyldy. Qazaqstan Ońtústik Koreıanyń soltústik kórshisine qatysty saıa­satyn únemi qoldap keledi jáne bolashaqta da solaı bolady dep úmittenemiz.

– Sońǵy jyldary Qazaq­stan­nan Ońtústik Koreıaǵa bara­tyn eńbek mıgranttarynyń máse­lesi ózekti bolyp otyr. Osy máselede Ońtústik Koreıanyń usta­nymy qandaı?

– Joǵaryda aıtyp ótkenimdeı, eki el azamattarynyń dostyǵy men ózara qyzyǵýshylyǵy bizdiń yn­tymaqtastyǵymyzdy odan sa­ıyn ny­ǵaıta túsedi. 2014 jyly el­der a­rasynda vızasyz saparlar týraly kelisimge qol qoıyldy. Osydan keıin Koreıaǵa keletin qazaqstandyqtardyń sany kúrt ósti. Vızasyz rejimniń basty maq­saty – azamattar arasyndaǵy baılanysty jandandyrý boldy. О́kinishke qaraı, Qazaqstannyń keıbir azamattary bul kelisim­di burys paıdalanyp, Koreıaǵa zańsyz jumysqa ornalasý úshin bardy. Qazir Qazaqstannan kelgen zańsyz eńbek mıgranttarynyń sany shamamen 10 myń adamǵa jetti. Bul Koreıa qoǵamynda da ózek­ti máselege aınalyp otyr. Ony sheshý úshin eki el Úkimeti, son­daı-aq kóshi-qon, quqyq qorǵaý or­gan­dary tyǵyz jumys isteýi kerek dep esepteımin.

– Dıplomat retinde túrli mem­le­ket­terde qyzmet etken soń, sol elderdiń mádenıe­tin, ty­­nys-tirshiligin tanı bastaı­ty­­­nyńyz anyq. Qazaqstannyń, qazaq halqynyń qandaı erek­she­­l­ik­terin aıryqsha atap óter edińiz?

– Qazaqtardyń koreı máde­nıetine qyzyǵýy jáne keri­sinshe koreılerdiń qazaqtyń salt-dás­túrin erekshe baǵalaýynyń sebe­bi – eki ulttyń uqsastyǵynda der edim. Mysalǵa, qonaqqa degen qurmet pen iltıpatty aıtý­ǵa bolady. 1937 jyly qazaqtar­dyń koreı halqyn jyly qabyl­daǵa­nyn aıttyq. Osy sekildi qonaqjaı­lylyq Koreıada da bar. Otbasyn joǵary qoıý mádenıetimiz de uqsas. Úlken shańyraqtyń astynda ata-áje, nemerelerge deıin ýlap-shýlap bas qosqandy jaqsy kóre­miz. Úlkendi syılaý, qurmetteý eki halyqqa da tán. Sol sebepti qazaq­tar koreı telehıkaıalaryn kór­gende ortaq qasıetterimizdi baı­qap jatady. Tilimizdiń grammatıkasy men qurylymy da uqsas keledi. Keıde koreı tilin úırenip júrgen jastardy kórip, olardyń biliktiligine tańǵalamyn, tipti koreılermen shatastyryp alatyn kezder de bolady. Jańadan ashylǵan qazaq drama teatryna barǵanda spektaklde oınaǵan qazaq ulttyq mýzykalyq aspabyn myna koreıdiń aspabyna qat­ty uqsattym (bólmede turǵan jeti­genge uqsas aspapqa nusqady – M.B.). Aıtqym kelgeni – bizdi baı­lanystyratyn ulttyq, mádenı qundylyqtarymyz jetkilikti.

– Til úırený máselesi qalaı bolyp jatyr?

– Men 30 jyl boıy dıploma­tııa­lyq qyzmetpen aınalysyp kelemin jáne ana tilim – koreı tilinen basqa, aǵylshyn, qytaı, japon jáne nemis tilderin bile­min. Ázirge qazaqsha amandasý men kúndelikti qoldanysqa qa­jet keıbir sózdi úırendim. Árı­ne, til­di meńgerýge yqylasym bar. Alaı­da ózime shet tilin meńgerý­degi múmkindigimniń barlyǵyn qol­da­nyp tastaǵandaı kórinedi jáne jalqaýlyq ta baryn jasyr­maı­­­myn. Elshilikte qazaq tilinde sóı­leı­tin qyzmetkerler únemi kó­mek­­tesip otyrady, sondyq­tan tilge qatysty qıyndyqty sezinbeımin.

– Qazaqstanǵa kelgeli beri jumystan bos ýaqytyńyzdy qalaı ótkizip júrsiz? Elimizdiń kórik­ti jerlerin aralap, ult­tyq taǵamdarynan dám tatyp úlgerdińiz be?

– Qyzmetime pandemııa kezin­de kiriskenime qaramas­tan, Qazaq­stannyń Almaty, Qyzylorda, Atyraý jáne Túrkistan sekildi iri aımaqtarynda bolyp úlgerdim. Osy qalalardyń ishinde eń ma­ńyzdysy – Almaty der edim. О́ıt­keni onda Ońtústik Koreıa aza­mattarynyń kópshiligi, sondaı-aq koreı dıasporasynyń ókilderi turady. Sondaı-aq Almatyda Koreıa Respýblıkasynyń Bas konsýldyǵy ornalasqan. Esimde erekshe qalǵany – Qyzylorda qala­sy. Aıtyp ótkenimdeı, onda ko­reı halqynyń táýelsizdigi úshin kúresken qolbasshy, general Hon Bom Do jerlengen. Bul aımaq­tyń biz úshin tarıhı mańyzy zor. Qyzylordaǵa saparymda koreı dıasporasynyń ókilderimen kez­desip, 90 jastaǵy qarııamen tildes­tim. Koreıa úkimeti Qorqyt ata atyn­daǵy Qyzylorda memle­ket­tik ýnıversıtetinde koreı bu­ry­shyn ashty. Oǵan elimiz týraly kitaptar, oqýlyqtar men túrli materıaldardy tabys ettik. Kezdesýlerden keıin Qyzylorda taraby qazaqtyń ulttyq dastar­qanyn jaıyp, keshki asqa sha­qyrdy. Onda dámdi astan bólek, dás­túrli án men kúı oınady. Na­ǵyz qazaqı ortada ótken sol is­sa­par esimde erekshe qaldy.

Odan bólek, Atyraý, Aqtaý qa­lalary da Koreıa úshin mańyz­dy deý­­ge bolady. О́ıtkeni bul óńir­ler­de ekonomıkalyq yntymaqtas­tyq­ty arttyra túsetin energetıka salasyndaǵy mańyzdy jobalar iske asyrylýda. Sondaı-aq jaqynda túrki áleminiń rýhanı astanasy – Túrkistanǵa barǵan saparymdy erekshe atap ótkim keledi. Qazaqstan Úkimeti óńirdiń týrıstik múmkindigin arttyryp, túrki mádenıetin damytýǵa barynsha kóńil bólip otyrǵanyn kórdim. Túrkistan qarqyndy damyp keledi.

Al elordada demalys kúnderi bos ýaqytymda otbasymmen birge qazaqtyń taǵamdarynan dám tatý úshin meıramhanalarǵa baryp turamyz. Ulttyq taǵamdardy dámdi ázirleıtin oryndardy aldyn ala tańdap, mindetti túrde qonaq bolamyz. Nur-Sultan qalasynda Esil ózeniniń jaǵasynda serýen­degendi unatamyn. Sondaı-aq qala mańyndaǵy klýbtardyń birinde golf oınaımyn. Odan bólek, «Astana Opera» teatry, mýzeıler men qazaq drama teatry sekil­di mádenı oryndarǵa barǵandy unatamyn.

Qoǵamdyq oryndarǵa bar­ǵanda sanıtarlyq normalardy qatań saqtaıtynymyzdy aıta ket­kim keledi. Elshilik qyz­met­kerleri Qazaqstanda jappaı vak­sınalaý bastalǵan kezde shetel­dik dıp­lo­matııalyq ókildik­ter­diń arasyn­da alǵashqylardyń biri bolyp ekpe aldy. Vaksına­ny erte alý­ǵa múmkindik bergen Qazaq­stan Úki­metine alǵys aıt­qy­myz keledi.

– Elimizdiń kúndelikti tynys-tirshiligi týraly aqpa­ratty qaıdan alasyz? Qazaq baspasózin oqısyz ba?

– Kúndelikti aqparatty eldegi BAQ-ty jiti baqylap otyra­tyn qyzmetkerlerden bilip otyra­myn. Sondyqtan qoǵamda ne bo­lyp jatqanyn, ózekti máseleler­den habardarmyn. Men qazaq tilin bil­meı­tindikten, «Egemen Qazaqstan» sekildi gazetterdi ti­keleı oqı al­maımyn, kóbine aýdar­madan qa­raı­myn. Al aǵylshyn tilinde aq­­parat taratatyn onlaın basylym­dardy ózim qarap, kúndelikti oqyp otyramyn.

– Táýelsizdiginiń 30 jyldy­ǵyn atap ótip jatqan Qazaq eline qandaı tilegińiz bar?

– Sizderdi Qazaqstan Táýelsiz­di­giniń 30 jyldyǵymen shyn jú­rekten quttyqtaımyn! Osy 30 jyl ishinde Qazaqstan tolaǵaı ta­bystarǵa qol jetkizdi. Bul jetis­tikke el kóshbasshylarynyń qosqan úlesi mol. Degenmen bul – osy eldiń ár azamatynyń kúsh-jigeri men eńbeginiń jemisi. О́ki­nishke qaraı, 30 jyldyq mereıtoı pandemııamen tuspa-tus kelip otyr. Alaıda Qazaqstan Úkimeti bul daǵdarysty aqylmen sheship jatyr dep oılaımyn. Al Koreıa bıligi indetti eńserýde qol ushyn sozýǵa árdaıym daıyn.

Qazaqstandy Koreıa men onyń aza­mattary árqashan jaqyn dos retinde qabyldaıdy. Bola­shaq­ta elshi retinde osy strate­gııa­lyq se­riktestik qarym-qaty­na­sy­myz­dy odan ári damytýda kúsh-jigerimdi aıamaımyn. Bıyl – Qazaqstan Táýelsizdiginiń 30 jyl­dyǵy, ke­le­si jyly eki memlekettiń ara­syn­­daǵy dıplomatııalyq qarym-qatynastyń ornaǵanyna 30 jyl tolady. Aldaǵy otyz jylda bizdiń yntymaqtastyǵymyz odan saıyn tereńdep, nyǵaıa túsetin kezeń bolady dep senemin. Al qazaq­standyqtardan osy áriptestiktiń jańa deńgeıge kóterilýine qyzy­ǵý­­shylyq tanytyp, qoldaý bil­dirýdi suraımyn.

– Áńgimeńizge rahmet.

 

Áńgimelesken

Merýert BÚRKITBAI,

«Egemen Qazaqstan»

 

Sońǵy jańalyqtar

Pavlodarda taǵy da qus tumaýy tirkeldi

Aımaqtar • Búgin, 16:00

Urlanǵan 28 kólik tabyldy

Oqıǵa • Búgin, 15:11

Qazgıdromet aldaǵy qysqa boljam jasady

Qazaqstan • Búgin, 14:11

Atyraýda 23 adamdy shaıan shaqqan

Aımaqtar • Búgin, 13:35

Túrkistan oblysynda brakonerler ustaldy

Aımaqtar • Búgin, 12:40

Aqtaýda er adam bıikten qulap mert boldy

Aımaqtar • Búgin, 10:53

Sport jańalyqtaryna sholý

Sport • Búgin, 09:11

Bárimiz bir aspannyń astyndamyz

О́ner • Búgin, 09:10

Sýretshiler úıi ashyldy

Aımaqtar • Búgin, 09:08

Bal bulaq bolyp aqty

Aımaqtar • Búgin, 09:07

Ońaılyqpen em qonbaıdy

Medısına • Búgin, 09:05

Bárekeldi, Vıktorııa!

Sport • Búgin, 09:02

Taı elinde qola medal buıyrdy

Sport • Búgin, 09:00

Seısenbige arnalǵan aýa raıy boljamy

Aýa raıy • Búgin, 08:57

Mazmun men sapaǵa mán berilse

Bilim • Búgin, 08:55

Atyraý oblysy «sary» aımaqqa ótti

Koronavırýs • Búgin, 08:54

Salada sheshimin tabar is kóp

Bilim • Búgin, 08:52

Bala súıý – baqyt

Qoǵam • Búgin, 08:50

Qamba toldy astyqqa...

Aımaqtar • Búgin, 08:49

Barlyq salada ósim bar

Aımaqtar • Búgin, 08:47

Erekshe balalardy elegender

Aımaqtar • Búgin, 08:43

Uqsas jańalyqtar