Joǵary sanatty ınfeksıonıst dáriger, medısına ǵylymdarynyń kandıdaty Sáýle Atyǵaevanyń sózinshe, búginde úshinshi komponentti saldyrýǵa qatysty másele kún tártibinde tur.
«Dárigerler, onyń ishinde, ımmýnolog, vırýsologtardyń kózqarasy boıynsha vaksınanyń úshinshi komponentin saldyrý qajet bolýy múmkin. Jas kategorııasyna qaraı ár túrli kezeń kerek bolady. Revaksınasııanyń qajet ne qajet emes ekeni aǵzadaǵy antıdene sanyna qaraı anyqtalady. Sondyqtan antıdene sany 1-den tómen adamdarǵa revaksınasııa kerek bolýy múmkin. Búginde revaksınasııaǵa qatysty másele qarastyrylyp, talqylanyp jatyr. Aldaǵy tańda onyń jaýabyn alatyn bolamyz», dedi dáriger OKQ brıfınginde.
Vaksınanyń úshinshi dozasyn salý týraly máseleni Pfizer jáne BioNTech kompanııalary kótergen bolatyn. Búginde vaksınanyń úshinshi dozasyn saldyra bastaǵan el de bar. Ol - Izraıl. Elde 60 jastan asqandarǵa Pfizer-diń úshinshi dozasy salynyp jatyr. Sonymen qatar Izraıldiń Premer-Mınıstri Naftalı Bennett elde keıingi bes aıda vaksınanyń eki komponentin alǵandar 1 tamyzdan bastap úshinshi dozany saldyra alatynyn málimdedi.
