Qolaǵa kóńil tolmaı tur

Olımpıada aldynda Pre­zıdent Qasym-Jomart Toqaev­tyń qolynan Kók tý­dy alǵan, altyn medaldan birden-bir úmitker Qamshybek Qońqabaev keshe qola júldeni qanaǵat etti. Anyǵynda, jartylaı fı­nalda amerıkalyq Rıchard Tor­respen judyryqtasqan otan­dasymyzdyń esesi ketti. Gong estile sala bir-birine lap qoıǵan eki qarsylas alǵashynda kezek-kezek soqqy jasaýmen boldy. Alma-kezek shabýyldarmen ótken birinshi raýndta bes tóreshiniń bireýi jeńisti Qamshybekke berdi. Ekinshi raýndta biz kútpegen jaǵdaı oryn aldy. Amerıkalyq boksshy jerlesimizdi nokdaýnǵa jiberdi. Odan qalsa Qońqabaev tóreshiden eskertý aldy. Bul kezeńde barlyq tóreshi jeńisti Torreske jazdy. Al úshinshi raýndta Qamshybektiń murny sy­nyp, kezdesý toqtatyldy. Ná­tı­jesinde, barlyq tóreshi bir­aýyzdan amerıkalyq boksshyny jeńimpaz dep tanydy.

Sonymen el sengen Qam­shy­bek Qońqabaev ta jarys jolyn aıaqtady. Árıne, halyq oǵan úlken senim artqan edi. Biraq Olımpıadaǵa qatysatyndardyń eshqaısysy da osal emes. Onyń ústine aýyr salmaqtaǵylarǵa judyryqtasý óte qıyn. Keıde kezdesýdiń taǵdyryn jalǵyz soqqy sheshedi. Qamshybektiń qanshama jyl Ivan Dychkonyń kóleńkesinde júrgeni taǵy belgili. Orda buzar otyz jasynda qola medalǵa qol jetkizý de olja. Endi Qamshybek áýesqoı boksta ketken esesin kásipqoı boksta qaıtarady dep senemiz.

Torres aqtyq aıqasta ózbek boksshysy Bahodır Jalolovpen kezdesedi. Jalolov jartylaı fınalda tuńǵysh ret nokdaýn aldy. Sóıte tura brıtandyq boksshydan jeńisti julyp aldy. Aıtpaqshy, Torres 2019 jyly Ekaterıngbýrgte ótken álem chempıonatynda Jalolovtan nokaýt alyp, aýrýhanadan bir-aq shyqqan edi. Osy jolǵy shaıqas qalaı bolatynyn 8 tamyzda biletin bolamyz.

Erkin kúresten 57 kıloǵa deıingi salmaq dárejesinde jarys jolyna shyqqan Nurıslam Sanaev úshin jarys keremet bastaldy. Alǵashqy kezdesýin Gvıneıa-Bısaý eliniń ókili Iýna Fafe Dıamantınoǵa qar­sy ótkizgen jerlesimiz 7:0 ese­bimen jeńiske jetti. Al shırek fınaldaǵy qarsylasy tipti azýly edi. Álem chempıony, Azııa oıyndarynyń qola júldegeri japonııalyq Iýkı Takahashımen esh qaımyqpaı beldesken Nur­ıslam 6:4 esebimen basym tústi. Osylaısha, kishigirim sensasııa jasaǵan Sanaev aqtyq aıqas úshin úndistandyq Ravı Kýmarmen kilemge shyqqan bolatyn. Tar­tysty kezdesýdi Nurıslam jaq­sy bastady. Ol qarsylasyn birneshe ret aınaldyryp, 9:2 esebimen alǵa shyqqan. Biraq bul basymdyqty ol sońyna deıin  ustap tura almady. Sanaev aıaǵynan kishigirim jaraqat alyp, keıin úndilik balýan qarsy ádis­ke kóshti. Nátıjesinde, Ra­vı Kýmar Nurıslamdy taza jeń­di. Endi Nurıslam Sanaev Olım­pıa­danyń qola medali úshin kú­resedi.

Aıta keteıik, qazaqstandyq balýan úshin úndi balýany –  alynbaıtyn qamaldaı. Osymen úshinshi ret kezdesip, barlyǵynda da jeńiliske ushyrady.

Baıdarka esýden 500 metr qashyqtyqta baq synaǵan Natalıa Sergeeva irikteý kezeńinde (2:01.374) jetinshi orynnan kó­rindi. Al kanoemen 200 metr qashyqtyqqa saıysqa túsken Margarıta Torlopova tıisti qa­shyqtyqty 49,721 ýaqytta baǵyn­dyrdy. Eki sportshy da shı­rek fınalǵa joldama aldy.

Trektegi velosporttan irikteý kezeńi keshe bastalǵanymen, bizdiń sportshy úshin Olımpıada erte aıaqtaldy. Sprınt boıynsha kelesi aınalymǵa ótetin sportshylarda anyqtaý básekesinde Ser­geı Ponomarev úzdik 24 sport­­shynyń qatarynan kórine al­mady. Ol jarysty nebári 29-orynmen aıaqtady.