Birinshi oqý-jattyǵý jıynynyń sońǵy kúninde Iýrıı Mıhaılıs shákirtteri ekijaqty oıyn ótkizdi. Ádettegideı «aq» jáne «kók» jeıdege bólinip oınaǵan bul matchta «kókter» jaǵy basym tústi. Qorytyndy esep – 2:0. Osydan bir apta buryn ótken kezdesýde «aqtar» komandasy myqtylyq tanytqan edi.
Jeńimpaz komandanyń sapynan jańa oıynshylar – Krıstıan Tomas pen Kodı Kýnık mergendigimen kózge tústi. Taǵy bir aıta keterligi, «kókter» quramynda qaqpany «Barystyń» negizgi qaqpashysy Ionı Ortıo men Latvııa astanasy – Rıgada ótken shaıbaly hokkeıden álem chempıonatynda Qazaqstan quramasynyń negizgi qaqpashysy bolǵan, jýyrda ǵana «Barystyń» qataryna qosylǵan Nıkıta Boıarkın kúzetti.
«Kókter» quramynda Ionı Ortıo, Nıkıta Boıarkın, Ádil Beketaev, Samat Danııar, Mádı Dıhanbek, Darren Dıs, Artıom Korolev, Valerıı Orehov, Stanıslav Aleksandrov, Oleg Boıko, Dmıtrıı Gýrkov, Alekseı Zýbov, Álı Qasenov, Kodı Kýnık, Krıstıan Tomas jáne Roman Starchenko oınady.
Al «aqtar» sapynda Andreı Shýtov (qaqpashy), Olle Alsıng, Ilaıdja Vılıo, Erık Martınsson, Maksım Mıneev, Roman Savchenko, Egor Shalapov, Álıhan Ásetov, Kertıs Volk, Dinmuhamed Qaıyrjan, Nıkıta Mıhaılıs, Aldııar Nurlan, Egor Petýhov, Kırıll Savıskıı, Arkadıı Shestakov pen Ańsar Shaıhmeddenov óner kórsetti.
QHL-dyń byltyrǵy maýsymynda «Barystyń» úzdik surmergeniniń biri bolǵan shvesııalyq shabýylshy Iаkob Lılıa matchqa qatysqan joq. Klýb baspasóz qyzmetiniń málimeti boıynsha, ol jattyǵýlardyń birinde azdap jaraqat alyp qalǵan. Degenmen Lılıa qazir jeke baǵdarlama boıynsha jattyǵyp jatyr eken.
Osy oıynmen «Barys» «Mıchýrın» bazasyndaǵy oqý-jattyǵý jıynyn aıaqtady. Endi komanda «Prezıdent kýbogy» jarysynyń aldynda qorytyndy daıyndyǵyn «Barys-Arenada» ótkizedi. Aıta keteıik, 11-16 tamyz aralyǵynda ótetin «Prezıdent kýbogyna» «Barystan» bólek, «Kýnlýn Red Star» (Beıjiń) jáne «Dınamo» (Rıga) komandalary qatysady.
