Bul týraly «SQ-Farmasııa» kompanııasy málimdedi.
Kompanııa málimetinshe, Qazaqstan koronavırýsqa qarsy vaksınanyń tórt mıllıon dozasyn satyp alǵan. Ony Pekın bıologııalyq ónimder ınstıtýty ázirlegen jáne Sinopharm kompanııasy shyǵarǵan.
«Birinshi partııada bir mıllıon doza bar. Sinopharm vaksınasy Qazaqstanda tirkelgen besinshi vaksına bolmaq. Jaqyn kúnderi ony turǵyndar saldyra alady. Japsyrma jabystyrylǵannan keıin vaksınalar tez arada elimizdiń óńirlerine jiberiledi.
Dárilik zattardyń logıstıkasy barlyq standartqa sáıkes oryndalady. Sinopharm vaksınasynyń ereksheligi - ony jetkizý prosesi muzdatqyshty qajet etpeıdi, ol +2-den +8 gradýsqa deıingi temperatýrada saqtalady jáne tasymaldanady», delingen «SQ-Farmasııa» habarlamasynda.
Sinopharm Qytaı vaksınasy bıyl 7 mamyrynda Dúnıejúzilik densaýlyq saqtaý uıymymen maquldanǵan. Shildede ol COVAX vaksınalar bankine kirdi. Vaksına ınaktıvti, eki dozaly. Saqtaý merzimi - 24 aı.
«Bul DDSU qaýipsiz jáne tıimdi dep baǵalaǵan alǵashqy Qytaı preparaty. 45 elde eresekterge salýǵa ruqsat berilgen. Búginde vaksınany Qytaıdan basqa, BAÁ men Serbııada óndiredi. Sonymen qatar, Qytaı men BAÁ Sinopharm kompanııasynyń ınaktıvtendirilgen vaksınasyn úsh jastan 17 jasqa deıingi balalarǵa shuǵyl qoldanýyn maquldady», dep qosty kompanııa ókili.
