QR QM baspasóz qyzmeti usynǵan derek boıynsha, temeki boıynsha pılottyq joba 2018 jyldyń 1 qazanynda bastalyp, 2020 jyldyń 31 naýryzynda aıaqtaldy. Al alkogol ónimderi boıynsha joba 2019 jyldyń 1 maýsymynda bastalyp, 2021 jyldyń 1 qazanynda aıaqtalatyn bolady.
«Álemdik tájirıbe kórsetkendeı, bul tańbalaý mehanızmi zańsyz trafıkpen kúresýdiń tıimdi jáne dáleldengen ádisi ári Eýropalyq Odaq, Túrkııa, Brazılııa jáne taǵy basqa elderde belsendi túrde qoldanylyp keledi. EAEO-ǵa múshe memleketterdiń 2021 jylǵy 23 sáýirdegi sheshimine sáıkes elder bul taýarlarǵa mindetti tańbalaýdy ulttyq zańnamalarǵa sáıkes derbes túrde engizedi. Pılottyq kezeńde aqparattyq júıe men tańbalaýdyń qoldanylatyn mehanızmderiniń oryndylyǵy bıznes qaýymdastyqpen, onyń ishinde «Atameken» UKP alańynda aldyn ala talqylanyp tekserildi», dep atap ótti mınıstrlikten.
Aıta ketsek, 2020 jyldyń 1 qazanynan bastap fıltrli temekige, 2021 jyldyń 1 sáýirinen bastap temeki ónimderiniń basqa túrlerine mindetti tańbalaý engizildi. Qazaqstan aýmaǵynda óndirilgen nemese Qazaqstan Respýblıkasyna ákelinetin barlyq temeki sıfrlyq markalarmen tańbalanǵan.
Sonymen birge, salyq zańnamasyna sáıkes óndirýshilerdiń shyǵyndary amortızasııalyq tólemder arqyly tólenetin salyqtan shegerilý múmkindigi qarastyrylǵan. Temeki ónimderin satatyn bólshek saýdagerlerge, onyń ishinde «úı janyndaǵy» dúkenderde satý úshin qymbat jabdyqty satyp alýdyń qajeti joq. 2D skanerlerge balama bolyp tabylatyn «Naqty Sauda» (Android jáne IOS) tegin mobıldi qosymshasyn ornatý jetkilikti. Eger satýshy ónimdi úlken kólemde satatyn bolsa, onda ol 2D skanerin satyp ala alady. Búginde onyń baǵasy 25 myń teńge shamasynda.
Taýardyń basqa túrleri úshin, mysaly, sút ónimderi, qant qosylǵan sýsyndar jáne basqalaryna pılottyq jobany salalyq mınıstrlikter júzege asyrady. Qarjy mınıstrligi olarǵa baqylaý jáne ákimshilik sharalardy qoldanbaıdy.
