Depýtattar mekeme ujymymen kezdesý barysynda 2020 jyly Táýelsizdik kúni qarsańynda palatada ashylǵan Sırek kitaptar men basylymdar murajaıyn kórdi. Onda Alash zııalylarynyń jumystary men júz jyldyq tarıhy bar eksponattar qoıylǵan bolatyn. Senatorlarǵa Palata muraǵatynda saqtalǵan kitap qorynyń jaı-kúıi, sondaı-aq saladaǵy sheshýdi talap etetin problemalar týraly aıtyldy.
Senator Dınar Nóketaeva sońǵy jyldary maman-bıblıograftardy daıarlaıtyn jalǵyz joǵary oqý orny – Qazaq ulttyq qyzdar pedagogıkalyq ýnıversıtetine memlekettik granttar bólinbeıtinin atap ótti. «Sonyń nátıjesinde birneshe granttyq oryndy rektor ǵana bólip keledi. Qalǵan stýdentter aqyly negizde oqýǵa májbúr bolyp otyr. Osyǵan baılanysty sala mamandaryn daıarlaý úshin granttar bólý máselesin sheshý qajet», dedi ol.
Senator Nurtóre Júsip óz kezeginde qazaq jastarynyń saýatty jáne rýhanı damýy úshin áleýmettik máselelerdi sheshýmen qatar, jetkinshek urpaqty rýhanı baıytýǵa da nazar aýdarý mańyzdy ekenin atap ótti. «Atap aıtqanda, kórkem shyǵarmalardyń tırajyn ulǵaıtý qajet. Eger buryn mádenıet salasy «qaldyq esebinen» qarjylandyrylǵan bolsa, qazir olaı emes. Baspagerler burynǵy keńestik kezeńdegi jınaqtardy qaıta basyp shyǵarýdy toqtatyp, zaman talabyna sáıkes jańasha jazatyn zamanaýı avtorlardyń shyǵarmalaryn jarııalaý mańyzdy. Bul, ásirese, balalar ádebıetine qatysty», dedi senator.
Depýtattar, sonymen qatar Senattyń ótken sessııadaǵy qyzmetiniń nátıjeleri, qazaqstandyqtardyń ómirin jaqsartý jónindegi qabyldanǵan zańdar týraly, sondaı-aq senatorlardyń sessııa barysynda kótergen ózekti máseleleri, onyń ishinde kitaphana salasy qyzmetkerleriniń jalaqysyn kóterýge qatysty saýaldar týraly aıtty. Senatorlar osy kezdesý barysynda aıtylǵan barlyq problemalardy baqylaýǵa alyp, olardy sheshýge jaýapty memlekettik organdar aldynda kóterýge nıettenip otyr.
