Bul aksııa avtoáýesqoılar men jaıaý júrginshilerdi túsinistikpen qaraýǵa jáne arnaıy kólikke jol berýge shaqyrdy, óıtkeni bul bireýdiń ómirin saqtap qalýy múmkin. Tártip saqshylary jolda kedergi keltirgeni úshin júrgizýshilerge 7 AEK-ke deıin aıyppul salynatynyn eske saldy.
2021 jyldyń basynan bastap qutqarýshylar 3303 shaqyrtýǵa bardy. Onyń ishinde 469 oqıǵa — órt, avarııalyq-qutqarý jumystary – 938 shaqyrtý. О́rtten 54 adam qutqarylyp, 7 adam qaza tapty. О́tken jylmen salystyrsaq, byltyr órt sóndirýshiler 2387 shaqyrtýǵa shyqqan.
Onyń ishinde órt – 331, avarııalyq-qutqarý jumystary – 695. Onyń basym bóligi turǵyn úı sektoryna tıesili.
«О́rt shyqqan jaǵdaıda órt sóndirýshiler oqıǵa ornyna 10 mınýttan keshikpeı jetýi tıis. Al kólik keptelisi jaǵdaıynda jyldam jetý ekitalaı. Qutqarýshylardyń oqıǵa ornyna jyldam jetýi adam ómirin qutqaryp qalýǵa áser etedi. Árbir sekýnd mańyzdy», dep atap ótti TJD.
О́rt sóndirýshilerdiń aıtýynsha, júrgizýshiler jaýapkershilikti sezinip, arnaıy kólikterdiń ótip ketýine járdem etedi. Biraq jaıaý júrginshiler arasynda sıren daýsyna mán bermeıtinderi de bar eken.
«Jaǵdaı ártúrli. Jaıaý júrginshiler qulaqqap taǵyp alyp júredi. Tıisinshe eshnárse estimeıdi, kórmeıdi. Biz dál janyna toqtaǵan kezde ǵana baıqaıdy. Sol sııaqty júrgizýshi ótkizip jibergisi keletin, biraq ońǵa nemese solǵa burylýyna múmkindik bolmaıtyn sátter de bar. Osyndaı kezde qarsy baǵytqa shyǵýǵa májbúr bolamyz. Turǵyn úı aýlalarynda da úlken problema bar. Kólikter retsiz qoıyla salady nemese shlagbaýmdar jabyq turady. Osy sebepti saǵat 22:00-23:00-den keıin jedel járdem, órt sóndirý kólikteri qajetti úıge jete almaıdy», dedi №2 MО́SB bólimshe komandıri, aǵa serjant Dostan Jákenov.
