Foto: Aleksandr Kýprıenko
«Elordada sporttyq klaster jaqsy damyǵan. Jyl saıyn halyqaralyq standarttarǵa saı jańa sport ǵımarattaryn ashyp jatyrmyz. Qalada 1 mln 200 myń adam turady, olardyń úshten biri – jastar. Memleket basshysynyń tapsyrmasyna sáıkes buqaralyq sportty damytý mańyzdy.
Basty mindetimiz — sport nysandarynyń bárin qala turǵyndaryna qoljetimdi etý.
Birinshi. Elorda Jastary baǵdarlamasyn qabyldadyq. Bul baǵdarlama turǵyn úı, bilim alý, jumysqa ornalasý jáne bos ýaqytty tıimdi ótkizý sııaqty máselelerdi sheshýge septigin tıgizedi. Oǵan taǵy da bir baǵyt qosylady. Ol – buqaralyq sportty damytý baǵyty.
Mysaly, ótken jyly jeńil atletıkalyq sport keshenin ashtyq, qazir onda jeńil atletıkanyń 7 túri boıynsha kásibı sportshylar ǵana aınalysa alady.
Elorda turǵyndaryn kóbirek qamtý maqsatynda qyrkúıek aıynan bastap oǵan tilek bildirýshilerdiń bári bara alady. Iаǵnı jeńil atletıkamen tilek bildirýshilerdiń bári aınalyspaq. Jeńil atletıka keshenine kúnine 750 adam, al aıyna 20 myńnan astam adam bara alady.
Ekinshi. Bizdiń basty mindetimiz —balalar men jasóspirimder sportyn qoldaý. Qazir qalada 8 myńnan astam balany qamtıtyn 11 balalar men jasóspirimder sport mektebi jumys isteıdi.
Qosymsha qarjylandyrý baǵyty esebinen balalar sanyn 50%-ǵa arttyrýdy josparlap otyrmyz. Sondaı-aq qosymsha jattyqtyrýshylardy jumysqa alamyz. Jastar buqaralyq sporttyń qaı túri boıynsha jáne qaıda shuǵyldana alatyny týraly stendter bolady.
Sondaı-aq, balalar men jasóspirimder mektepteriniń quramynda erekshe qajettiligi bar balalardyń sportpen aınalysýyna baǵyttalǵan jeke baǵyt bar ekenin atap ótken jón. Inklıýzııa jelisi boıynsha 17 sporttyq pán bar.
Úshinshi. Júıeli deńgeıde aýla klýbtarynyń sanyn kóbeıtýdi jalǵastyramyz. Qazir olardyń sany 30-dan kóp, birinshi kezeńde sanyn 50-ge deıin kóbeıtemiz. Bul eki ese kóp balany qamtýǵa múmkindik beredi.
Tórtinshi. Sonymen qatar, qalanyń tórt eldi mekeninde (Kóktal, О́ndiris, Úrker (Ilınka) jáne Temirjolshylar) jalpyǵa qoljetimdi dene shynyqtyrý-saýyqtyrý keshenderin, sondaı-aq Azııa elderinde tanymal ústel tennısi ortalyǵyn salyp jatyrmyz.
Kóktalda dene shynyqtyrý-saýyqtyrý kesheniniń qurylysy aıaqtaldy. Bul sport keshenderinde qala turǵyndary ártúrli sport túrlerimen tegin aınalysyp, densaýlyǵyn nyǵaıta alady.
Besinshi. «Nur-Sultan – jaıly qala» master-jospary aıasynda sońǵy eki jylda abattandyrylǵan aýlalar men qoǵamdyq keńistikter sany (saıabaqtar, gúlzarlar, jelekjoldar) 400-di quraıdy.
Bul qoǵamdyq oryndar sporttyq ınfraqurylymdy qamtıdy: fýtbol, voleıbol, basketbol, strıt-vorkaýt, velojol jáne t.b.
Osylaısha, Prezıdenttiń tapsyrmasy boıynsha sporttyq ınfraqurylymdy kásibı klýbtarǵa emes, buqaralyq sport túrlerine barynsha qoldaý kórsetýge basa nazar aýdara otyryp damytamyz.
Buqaralyq sportqa baýlý qala turǵyndarynyń densaýlyǵyna oń áser etedi», dep jazdy elorda ákimi.
